వస్తు సేవల పన్ను(జీఎస్టీ) అమల్లోకి వచ్చి నాలుగు వసంతాలు పూర్తైన నేపథ్యంలో.. కేంద్ర ఆర్థిక శాఖ మంత్రి నిర్మలా సీతారామన్ కీలక వ్యాఖ్యలు చేశారు. నిత్యావసరాలైన తలనూనె, టూత్పేస్ట్, వాటర్ హీటర్స్ వంటి ధరలు... జీఎస్టీ ముందురోజులతో పోల్చితే ప్రస్తుతం భారీగా దిగొచ్చాయని తెలిపారు. ఈ మేరకు బుధవారం ఆమె వరుస ట్వీట్లు చేశారు. పన్ను రేట్లు తగ్గిన వస్తువుల వివరాలను షేర్ చేశారు. జీఎస్టీ అమల్లోకి వచ్చిన 2017 జులై 1 తర్వాత.. సగటు పన్నురేటు 11.6 శాతానికి పరిమితమైందని పేర్కొన్నారు.
పన్ను రేటు తగ్గిన వివిధ వస్తువులు..
- సాధారణ వస్తువులైన తలనూనె, టూత్పేస్ట్, సబ్బులు వంటి వాటిపై జీఎస్టీకి ముందు 29.3శాతం పన్ను ఉండగా.. ప్రస్తుతం అది 18శాతంగా ఉంది.
- గృహోపకరణాలైన రిఫ్రిజరేటర్లు, వాషింగ్ మెషీన్లు, వ్యాక్యూమ్ క్లీనర్లు, గ్రైండర్లు, మిక్సర్లు, షేవర్లు, జుట్టు క్లిప్పులు, వాటర్ హీటర్స్, హెయిర్ డ్రయ్యర్స్, విద్యుత్ ఇస్త్రీ పెట్టెలు, టీవీలపై అంతకుముందు 31.3 శాతం పన్ను రేటు ఉండగా ప్రస్తతం అది 18శాతంగానే ఉంది.
- జీఎస్టీ కంటే ముందు సినిమా టికెట్లపై పన్ను రేటు 35శాతం నుంచి 110శాతంగా ఉండేది. ప్రస్తుత జీఎస్టీ సమయంలో అది 12శాతం(టికెట్ ధర రూ.100లోపు ఉంటే), 18 శాతంగా ఉంది.
- జీఎస్టీతో వ్యవసాయ రంగానికి మంచి లాభాలు దక్కాయి. ఎరువులపై ఉన్న నికర పన్ను సగానికి సగం తగ్గింది. వ్యవసాయ పరికరాలపై ఉన్న పన్ను రేటు 15%, 18% నుంచి 12శాతానికి తగ్గింది. సేద్య రంగానికి సంబంధించిన ఇతర వస్తువులపై పన్ను రేటు 8శాతం నుంచి 5శాతానికి తగ్గింది.
- పశుగ్రాసం, చేపల ఆహారం, పౌల్ట్రీ ఆహారంపై జీఎస్టీలో పన్ను మినహాయింపు దక్కింది. ఈ నాలుగేళ్ల కాలంలో.. జీఎస్టీ వల్ల దేశీయ మార్కెట్లకు పన్ను రేటు తగ్గి లాభం చేకూరింది. ఫలితంగా అవి అంతర్జాతీయ మార్కెట్లతో పోటీ పడే స్థాయికి చేరుకున్నాయి.
- 400 వస్తువులు, 80 సేవలపై జీఎస్టీ రేట్లు తగ్గాయి. జీఎస్టీ కంటే ముందు.. కేంద్రం, రాష్ట్రాల పన్నులు 31శాతంగా ఉండేవి. అయితే జీఎస్టీ తర్వాత ఆ పన్ను శాతం తగ్గగా.. పన్ను చెల్లింపుదారుకు మంచి ఉపశమనం లభించింది.
66 కోట్లకుపైగా జీఎస్టీ రిటర్నులు..
జీఎస్టీతో తక్కువ పన్ను రేట్ల ఫలితంగా ఇప్పటివరకు 66 కోట్లకుపైగా జీఎస్టీ రిటర్నులు దాఖలయ్యాయని ట్విట్టర్ వేదికగా కేంద్ర ఆర్థిక మంత్రిత్వ శాఖ తెలిపింది. దేశవ్యాప్త జీఎస్టీలో.. ఎక్సైజ్ సుంకం, సేవల పన్ను, వ్యాట్ వంటి 17 రకాల లెవీ పన్నులు కలిశాయని చెప్పింది. కరోనా మహమ్మారి సమయంలో వర్తకులకు లాభం చేకూర్చేలా జీఎస్టీ మండలి పలు కీలక సూచనలు చేసిందని వివరించింది.
"జీఎస్టీ ద్వారా వార్షికాదాయం రూ.40 కోట్లలోపు ఉన్న సంస్థలకు పన్ను మినహాయింపు ఉంది. రూ.1.5 కోట్ల ఆదాయం ఉన్న సంస్థలు.. 1 శాతం పన్నును మాత్రమే చెల్లించే వెసులుబాటు కల్పించాం. సేవల రంగంలో, వ్యాపారాల్లో రూ.20 లక్షలవరకు వార్షికాదాయం ఉన్నావారికి పన్ను చెల్లించనవసరం లేదు. రూ.50 లక్షల వరకు ఆదాయాన్ని ఆర్జించే సర్వీస్ ప్రొవైడర్లకు కేవలం 6శాతం పన్ను చెల్లించే వెసులుబాటు ఉంది." అని కేంద్రం తెలిపింది.
"వినియోగదారుడికి, పన్ను చెల్లింపుదారుడికి స్నేహపూరితమైన విధానం.. జీఎస్టీ అని నిరూపితమైంది. జీఎస్టీ కంటే ముందు ఉన్న పన్ను రేట్లు జీఎస్టీ వచ్చిన తర్వాత తగ్గాయి. ఫలితంగా సకాలంలో పన్ను చెల్లించే వారి సంఖ్య పెరిగింది. ఇప్పటివరకు 66 కోట్లకు పైగా జీఎస్టీ రిటర్నులు దాఖలయ్యాయి. దాదాపు 1.3 కోట్ల మంది కొత్త పన్ను చెల్లింపుదారులు చేరారు."
-కేంద్ర ఆర్థిక మంత్రిత్వ శాఖ
క్లిష్టమైన పరోక్ష పన్నుల బాధ నుంచి విముక్తి చేస్తూ... పారదర్శకమైన పన్ను విధానం.. జీఎస్టీతో సాధ్యమైందని కేంద్రం చెప్పింది. దయార్ధంగా ఉంటూనే ఆర్థిక వృద్ధికి జీఎస్టీ మార్గం చూపిందని తెలిపింది. కేంద్రం, రాష్ట్రాల అభిప్రాయాల్ని ఏకతాటిపైకి తెచ్చేందుకు జీఎస్టీ మండలి ఉపకరించిందని పేర్కొంది. ఇప్పటివరకు 44 సార్లు సమావేశమైందని తెలిపింది.
జీఎస్టీ పాత్ర కీలకం: మోదీ
భారత ఆర్థిక వృద్ధిలో జీఎస్టీ మైలురాయిగా నిలిచిందని ప్రధానమంత్రి నరేంద్ర మోదీ బుధవారం పేర్కొన్నారు. దీని వల్ల వివిధ రకాల వస్తువులపై పన్ను రేట్లు తగ్గాయని చెప్పారు. సాధారణ ప్రజలపై పన్ను భారం తగ్గిందని తెలిపారు. జీఎస్టీ అమలమలోకి వచ్చి నాలుగేళ్లు పూర్తైన నేపథ్యంలో ఆయన ఈ వ్యాఖ్యలు చేశారు.
ఇదీ చూడండి: జులై 1 నుంచి అవి పనిచేయవ్- కొత్త రూల్స్ ఇవే...
ఇదీ చూడండి: 'కొవిడ్ పరికరాలు, ఔషధాలపై జీఎస్టీ తగ్గింపు'
