దేశంలో ఆర్థిక మందగమనం కొనసాగుతున్న వేళ 2019-20 ఆర్థిక సంవత్సరంలో వృద్ధిరేటు మరింత దిగజారే సూచనలు కనిపిస్తున్నాయి. ఈ మేరకు ప్రముఖ రేటింగ్స్ సంస్థ ఫిచ్ 2019-20 ఆర్థిక సంవత్సరంలో భారత వృద్ధిరేటు అంచనాను 4.6 శాతానికి తగ్గించింది. గతంలో 5.6 శాతంగా ఉంటుందని ఈ సంస్థ అంచనా వేసింది. మరో రేటింగ్స్ సంస్థ మూడీస్ 4.9 శాతంగా అంచనా వేయగా.. ఆసియా అభివృద్ధి బ్యాంకు 5.1 శాతంగా ఉంటుందని పేర్కొంది.
రిజర్వు బ్యాంకు అక్టోబర్‌లో 6.1 శాతంగా అంచనా వేసినప్పటికీ, ఇటీవల 5 శాతానికి తగ్గుతుందని ప్రకటించింది. తాజాగా 'ఫిచ్' అంచనాలు మరింత తగ్గాయి. బ్యాంకింగేతర ఆర్థిక సంస్థల నుంచి రుణ లభ్యత తగ్గడం, వాణిజ్యం మరింత క్షీణించడం వంటి కారణాలతో భారత వృద్ధిరేటు అంచనాలను తగ్గించినట్లు ఫిచ్ వెల్లడించింది.
అయితే భారత ఆర్థిక వ్యవస్థ ప్రస్తుతం ఒడుదొడుకుల్లో ఉన్నా.. 2020-21 నాటికి వృద్ధిరేటు 5.6 శాతం, 2021-22 నాటికి 6.5 శాతానికి పెరుగుతుందని ఫిచ్ ఆశాభావం వ్యక్తం చేసింది.
ఇదీ చూడండి:ఎగ్జిక్యూటివ్ ఛైర్మన్ పదవికి ఆనంద్ మహీంద్రా గుడ్ బై!
