గత ఆర్థిక సంవత్సరం(2020-21) భారత్కు 59.64 బిలియన్ డాలర్ల విదేశీ ప్రత్యక్ష పెట్టుబడులు (ఎఫ్డీఐ) వచ్చినట్లు వాణిజ్య మంత్రిత్వ శాఖ తెలిపింది. అంతకు ముందు ఆర్థిక సంవత్సరంతో పోలిస్తే ఈ మొత్తం 19శాతం ఎక్కువని వెల్లడించింది. సరళమైన విధానాలు, సులభతర వాణిజ్యం వంటివి ఎఫ్డీలు పెరిగేందుకు కారణమైనట్లు పేర్కొంది.
ఈక్విటీ, రీ-ఇన్వెస్టెడ్ ఎర్నింగ్స్, మూలధన పెట్టుబడులు అన్ని కలిపి గత ఏడాది భారత్కు వచ్చిన ఎఫ్డీఐలు 81.72 బిలియన్ డాలర్లుగా తెలిపింది వాణిజ్య మంత్రిత్వ శాఖ. 2019-20లో నమోదైన 74.39 బిలియన్ డాలర్ల ఎఫ్డీఐలతో పోలిస్తే.. ఈ మొత్తం 10 శాతం ఎక్కువ.
ఏ రంగానికి ఎంత?
గత ఆర్థిక సంవత్సరం మొత్తం ఎఫ్డీఐలలో అత్యధికంగా 44శాతం కంప్యూటర్ సాఫ్ట్వేర్, హార్డ్వేర్ రంగానికే వచ్చినట్లు వాణిజ్య శాఖ పేర్కొంది. ఆ తర్వాతి స్థానాల్లో కన్స్ట్రక్షన్ (13 శాతం), సేవా రంగం (8 శాతం) ఉన్నాయి.
గుజరాత్ అగ్రస్థానం..
రాష్ట్రాల వారీగా చూస్తే.. 37 ఎఫ్డీఐలు సాధించి గుజరాత్ అగ్రస్థానంలో నిలిచింది. ఆ తర్వాతి స్థానాల్లో మహారాష్ట్ర (27 శాతం), కర్ణాటక (13 శాతం) ఉన్నాయి.
ఇదీ చదవండి:పసిడి బాండ్ల ఇష్యూ షురూ- గ్రాముకు ఎంత?
