సైబర్ భద్రత విషయంలో భారత దేశం ముప్పు ఎదుర్కొంటుందని ఎప్పటి నుంచో పలు నివేదికలు చెబుతున్నాయి. భారత్లోని 60 శాతం సంస్థలు ఈవిషయంలో ఆందోళన వ్యక్తం చేస్తున్నాయని యాక్సెంచర్ తాజా నివేదిక స్పష్టం చేసింది. ఆయా సంస్థలకు సైబర్ భద్రతకు సంబంధించి వ్యవహరించాల్సిన తీరుపైనా స్పష్టత లేదని అంచనా వేసింది.
ప్రపంచ వ్యాప్తంగా 1700 మంది సీఈఓలు, ఇతర ఎగ్జిక్యూటీవ్లతో మాట్లాడి ఈ సర్వే చేసింది యాక్సెంచర్. ఇందులో 100 మంది భారతదేశంలోని పెద్ద సంస్థలకు చెందినవారు ఉన్నారు.
డిజిటల్కూ అవరోధమే....
భారత్లో 77 శాతం మంది... డిజిటల్ ఆర్థికవ్యవస్థ అభివృద్ధికి సైబర్ భద్రతే అవరోధమని అభిప్రాయపడ్డారు. భారీ మార్పులు వచ్చేంత వరకు ఈ పరిస్థితి కొనసాగుతుందని వారు స్పష్టం చేశారు.
ఒంటరిగా ఏ సంస్థ కూడా సైబర్ భద్రత సవాళ్లను ఎదుర్కోవటం కష్టమని, ఇందుకోసం ఉమ్మడి కృషి కావాలని 60 శాతం మంది అన్నారు. ప్రభుత్వం కఠిన వ్యాపార నిబంధనలు తీసుకురావాలని 69 శాతం మంది చెప్పారు.
ఐదేళ్లలో 361 లక్షల కోట్లు నష్టం...
"అంతర్జాల ఆధారిత కంపెనీలు సైబర్ భద్రత కోసం సరైన చర్యలు తీసుకోలేకపోతున్నాయి. ఫలితంగా ప్రపంచవ్యాప్తంగా వచ్చే ఐదేళ్లలో దాదాపు 361 లక్షల కోట్లు(5.2 ట్రిలియన్ డాలర్లు) ఆదాయాన్ని కోల్పోవటం కానీ, అదనపు ఖర్చులు చేయటం గానీ జరగవచ్చు" అని నివేదిక అంచనా వేసింది.
