జూమ్ వంటి దిగ్గజ వీడియో కాన్ఫెరెన్సింగ్ యాప్లను తలదన్నేలా... ఫేస్బుక్ తీసుకొచ్చిన 'మెసెంజర్ రూమ్స్' త్వరలో వాట్సాప్ వెబ్లో కనిపించనుంది. అవును.. ఇక మీ ల్యాప్టాప్లు, పీసీల్లో వాట్సప్ తెరిస్తే.. 'ఫైల్ అటాచ్ బటన్' కింద "ఈ మెసెంజర్ రూమ్స్" షార్ట్కట్ అందుబాటులోకి రానుంది.
గత నెల ఫేస్బుక్ సరికొత్త వీడియో కాన్ఫెరెన్సింగ్ టూల్ను విడుదల చేసింది. అదే 'మెసెంజర్ రూమ్స్'. ఈ మెసెంజర్ రూమ్స్లో ఒకేసారి 50 మందితో వీడియో కాల్ మాట్లాడే సౌకర్యం ఉంటుంది. అయితే, ఈ మెసెంజర్ రూమ్స్ కోసం ప్రత్యేకంగా ఫేస్బుక్ లాగ్ఇన్ అవ్వాల్సిన అవసరం లేకుండా.. వాట్సప్ వెబ్ వెర్షన్లో కనిపించేలా ఏర్పాటు చేస్తోంది ఎఫ్బీ. దీంతో వాట్సప్ నుంచే మెసెంజర్ రూమ్స్ ద్వారా 50 మందితో వీడియోకాల్ మాట్లొడొచ్చు.
అధికారిక నివేదిక ప్రకారం.. ఈ మెసెంజర్ రూమ్స్ షార్ట్కట్ జూన్ 2 నుంచి వాట్సాప్ వెబ్లో కనిపిస్తుంది. ఇందులో వాట్సాప్ గ్రూప్ సృష్టించినట్టుగానే మెసెంజర్ రూమ్ క్రియేట్ చేసుకుని వీడియోకాలింగ్ కోసం స్నేహితులను ఇన్వైట్ చేయొచ్చు. అంతే కాదు, న్యూస్ఫీడ్, గ్రూప్స్, ఈవెంట్ పేజీలలో లింక్స్ కూడా షేర్ చేసుకోవచ్చు.
ఇదీ చదవండి:'ప్రపంచదేశాలతో పోలిస్తే భారత్ మెరుగ్గా ఉంది'
