'దేశంలో రిమెడిసివిర్ విక్రయాలకు అనుమతివ్వండి'

కరోనాను అరికట్టగలదని భావిస్తున్న రిమెడిసివిర్ ఔషధాలను దేశంలో విక్రయించేందుకు అనుమతులు ఇవ్వాలని అమెరికా ఫార్మా దిగ్గజం గిలియడ్.. భారత ఔషధ నియంత్రణ సంస్థకు దరఖాస్తు చేసింది. ఇందుకోసం రిమెడిసివిర్ ఔషధ క్లినికల్ ట్రయల్స్​ను సంస్థకు సమర్పించింది.

కరోనా చికిత్సలో ప్రభావం చూపుతుందని భావిస్తున్న రిమెడిసివిర్ ఔషధాలను దేశంలో విక్రయించేందుకు అనుమతి కోరుతూ అమెరికా ఫార్మా దిగ్గజం గిలియడ్ సైన్సెస్... భారత ఔషధ నియంత్రణ సంస్థకు(సీడీఎస్​సీఓ) దరఖాస్తు చేసుకుంది. ఈ మేరకు రిమెడిసివిర్ ఔషధానికి సంబంధించిన క్లినికల్ ట్రయల్స్ సమాచారాన్ని ఔషధ నియంత్రణ సంస్థకు సమర్పించింది.

'రిమెడిసివిర్ అమ్మకాలకు అనుమతి కోసం గిలియడ్ దరఖాస్తు చేసింది. ఈ అభ్యర్థనను నిపుణుల కమిటీ ద్వారా పరిశీలించి.. ఇచ్చిన సిఫార్సుల మేరకు తుది నిర్ణయం తీసుకుంటామ'ని అధికార వర్గాలు ప్రకటించాయి.

రిమెడెసివిర్ ఔషధం

ఈ ఔషధాన్ని భారత్​లోనే తయారు చేసి.. అమ్మేందుకు భారతీయ ఫార్మా సంస్థలు సిప్లా, హెటిరో ల్యాబ్స్ గిలియాడ్ సైన్సెస్‌తో ఒప్పందం చేసుకున్నాయి. యాంటీ వైరల్ ఔషధమైన రిమెడిసివిర్‌ను అత్యవసర సమయాల్లో కొవిడ్‌ రోగుల చికిత్స కోసం వినియోగించవచ్చని అమెరికా ఔషధ నియంత్రణ సంస్థ యూఎస్​ఎఫ్​డీఏ సిఫార్సు చేసింది.

అయితే ఈ ఔషధంపై అమెరికా అందించిన క్లినికల్ డేటా ఆధారంగా.. తమదేశంలో రిమెడిసివిర్‌ను వాడేందుకు జపాన్ ప్రభుత్వం ఇప్పటికే అనుమతించింది. ఈ నేపథ్యంలో భారత్​లోనూ ప్రత్యేక పరిస్థితులలో రిమెడిసివిర్​ వినియోగానికి అనుమతి లభించవచ్చని నిపుణులు భావిస్తున్నారు.

ఇదీ చూడండి: కరోనా వల్ల 11 ఏళ్ల వెనక్కి దేశార్థికం