క్రికెట్ ప్రపంచ కప్ నేపథ్యంలో జూన్లో భారీగా పుంజుకున్నాయి టీవీల అమ్మకాలు. జులైలో మళ్లీ సాధారణ స్థాయికి చేరాయి. టీవీ పరిశ్రమల వర్గాలు వెల్లడించిన ఇటీవలి గణాంకాల్లో ఈ విషయాలు వెల్లడయ్యాయి.
క్రెకెట్ మానియాతో జూన్ అమ్మకాలు భారీగా ఉన్నా.. సీజన్ ముగిసిన తర్వాత కొనుగోళ్లకు మొగ్గు చూపడం లేదు వినియోగదారులు. అధిక ధరల నేపథ్యంలో కొనుగోళ్లు తగ్గినట్లు భావిస్తున్నాయి పరిశ్రమ వర్గాలు. ఈ నేపథ్యంలో టీవీలపై జీఎస్టీని తగ్గించాలని ప్రభుత్వాన్ని కోరుతున్నాయి.
టీవీలతో పాటు ఇతర గృహోపకరణాలైన వాషింగ్ మెషీన్లు, రిఫ్రిజిరేటర్ల అమ్మకాల వృద్ధి జూన్తో పోలిస్తే జులైలో తక్కువగా ఉన్నట్లు పరిశ్రమ వర్గాలు వెల్లడించాయి. వీటిపై కూడా జీఎస్టీని తగ్గించాలని కోరుతున్నాయి.
''గృహోపకరణాల పరిశ్రమ పూర్తిగా క్షీణించకముందే ప్రభుత్వం చర్యలు తీసుకుంటే కాస్త పోత్సాహం లభిస్తుంది. తక్కువ జీఎస్టీ శ్లాబ్లో వీటిని చేర్చాలన్న మా విన్నపానికి ప్రభుత్వం సానుకూలంగా స్పందిస్తుందని మేం భావిస్తున్నాం." - మనీశ్ శర్మ, పానసోనిక్ సీఈఓ
