అమెరికా-చైనా వాణిజ్య యుద్ధ భయాలు, దేశీయంగా కీలక గణాంకాలపై ప్రతికూల అంచనాల నడుమ స్టాక్ మార్కెట్లు నేడు నష్టాలతో ప్రారంభమయ్యాయి.
బొంబాయి స్టాక్ ఎక్స్చేంజి సూచీ-సెన్సెక్స్ దాదాపు 224 పాయింట్లు క్షీణించింది. ప్రస్తుతం 39,726 వద్ద ట్రేడవుతోంది. జాతీయ స్టాక్ ఎక్స్చేంజి సూచీ-నిఫ్టీ 67 పాయింట్లు కోల్పోయి 11,898 వద్ద ట్రేడింగ్ సాగిస్తోంది.
విశ్లేషణ
అమెరికా-చైనా వాణిజ్య ఒప్పందం అంచనాలపై అమెరికా అధ్యక్షుడు డొనాల్డ్ ట్రంప్ ప్రతికూలంగా స్పందించారు. చైనాతో వాణిజ్య ఒప్పందానికి సిద్ధంగా లేమని ఇటీవల ప్రకటించారు. ఈ ఒప్పందానికి చైనానే అడ్డుపడుతోందంటూ ఆరోపించారాయన. ఈ ప్రకటనతో వాణిజ్య యుద్ధం మరింత తీవ్రమవుతుందన్న అంచనాలతో మదుపరులు అప్రమత్తంగా వ్యవహరిస్తున్నారు.
వీటితో పాటు పారిశ్రామికోత్పత్తి, రిటైల్ ద్రవ్యోల్బణం గణాంకాలను నేడు వెల్లడించనుంది కేంద్ర గణాంకాల కార్యాలయం. వీటి ప్రభావం కూడా మార్కెట్లకు ప్రతికూలంగా మారింది.
లాభనష్టాల్లోనివివే..
టాటా స్టీల్, వేదాంత, సన్ ఫార్మా, ఓఎన్జీసీ, ఏషియన్ పెయింట్స్, రిలయన్స్ షేర్లు లాభాల్లో ట్రేడవుతున్నాయి.
ఎస్ బ్యాంకు, బజాజ్ ఆటో, హెచ్సీఎల్టెక్, టీసీఎస్, మారుతీ, భారతీ ఎయిర్టెల్, ఐసీఐసీఐ బ్యాంకు షేర్లు నష్టాల్లో కొనసాగుతున్నాయి.
రూపాయి, ముడిచమురు
నేటి సెషన్ ప్రారంభంలో రూపాయి 7 పైసలు బలపడింది. డాలర్తో పోలిస్తే రూపాయి మారకం విలువ 69.37 వద్ద కొనసాగుతోంది.
ముడిచమురు ధరల సూచీ-బ్రెంట్ 1.36 శాతం తగ్గింది. బ్యారెల్ ముడిచమురు ధర 61.44 డాలర్లుగా ఉంది.
ఇతర ప్రధాన మార్కెట్లు ఇలా...
ఆసియాలోని ఇతర అన్ని మార్కెట్లపై అమెరికా-చైనా వాణిజ్య యుద్ధ భయాలు ప్రతికూల ప్రభావం చూపిస్తున్నాయి. చైనా, జపాన్, దక్షిణ కొరియా సూచీలు నేటి సెషన్ను నష్టాలతో ప్రారంభించాయి.
ఇదీ చూడండి: ఆర్టీజీఎస్, నెఫ్ట్ ఛార్జీల్లేవ్.. జులై 1 నుంచి అమలు
