స్టాక్ మార్కెట్లు నేడు భారీ నష్టాల దిశగా సాగుతున్నాయి. బొంబాయి స్టాక్ ఎక్స్చేంజి సూచీ-సెన్సెక్స్ దాదాపు 250 పాయింట్లు క్షీణించి 38,830 వద్ద ట్రేడవుతోంది. జాతీయ స్టాక్ ఎక్స్చేంజి సూచీ-నిఫ్టీ 75 పాయింట్లు కోల్పోయి 11,680 వద్ద కొనసాగుతోంది.
ఇవీ కారణాలు
అంతర్జాతీయ మార్కెట్ల నుంచి వెలువడ్డ ప్రతికూల సంకేతాలు నేటి ట్రేడింగ్పై ప్రభావం చూపుతున్నాయి. విదేశీ మదుపరులు లాభాల స్వీకరణకు మొగ్గు చూపుతున్నారు. అమెరికా ఫెడ్ ద్రవ్య పరపతి విధాన సమీక్ష నిర్ణయం బుధవారం వెలువడనుంది. ఈ నిర్ణయంపై అంచనాలు కూడా నేటి మార్కెట్లను ప్రభావితం చేస్తున్నాయి.
నష్టాలు పరిమితమే?
రూపాయి సానుకూలత, చమురు ధరల తగ్గుదల కారణంగా నష్టాలు పరిమితంగానే ఉండొచ్చని మార్కెట్ నిపుణులు అంచనా వేస్తున్నారు.
లాభానష్టాల్లోనివే
సెన్సెక్స్లో హెచ్సీఎల్టెక్, హెచ్డీఎఫ్సీ బ్యాంకు, ఏషియన్ పెయింట్స్, ఇన్ఫోసిస్, యాక్సిస్ బ్యాంకు షేర్లు ప్రధానంగా లాభాల్లో సాగుతున్నాయి.
యస్ బ్యాంకు షేర్లు అత్యధికంగా 24.81 శాతం నష్టాల్లోకి జారుకున్నాయి. ఆస్ట్రేలియా బ్రోకరేజి సంస్థ మెక్వారీ యస్ బ్యాంకు షేరు రేటింగ్ను ఇటీవల రెండు ర్యాంకులు తగ్గించింది. ఈ కారణంగా యస్ బ్యాంకు షేర్లు భారీగా పతనమయ్యాయి.
ఇండస్ఇండ్ బ్యాంకు, సన్ఫార్మా, హీరో మోటోకార్ప్, మారుతి, వేదాంత షేర్లు నష్టాల్లో ట్రేడవుతున్నాయి.
రూపాయి, ముడి చమురు
ఆరంభ ట్రేడింగ్లో రూపాయి 32 పైసలు బలపడింది. ప్రస్తుతం డాలర్తో రూపాయి మారకం విలువ 69.70 వద్ద కొనసాగుతోంది.
ముడి చమురు ధరల సూచీ బ్రెంట్ 0.22శాతం కీణించింది. బ్యారెల్ ముడి చమురు ధర 71.88 డాలర్ల వద్ద కొనసాగుతోంది.
ఇతరమార్కెట్లు ఇలా
ఆసియాలోని ఇతర ప్రధాన మార్కెట్లు జపాన్ సూచీ నిక్కీ, దక్షిణ కొరియా సూచీ కోస్పి, షాంఘై సూచీలు నష్టాలతో ట్రేడవుతున్నాయి.
