వడ్డీ రేట్లలో కోత విధిస్తూ రిజర్వు బ్యాంకు నిర్ణయం తీసుకుంది. అయితే జీడీపీ అంచనాల్లో తగ్గింపు, స్కైమెట్ ఇచ్చిన వాతావరణ అంచనాల నేపథ్యంలో స్టాక్ మార్కెట్లు నష్టాల్లో ముగిశాయి.
బొంబాయి స్టాక్ ఎక్స్చేంజి సూచీ-సెన్సెక్స్ 192.40 పాయింట్లు నష్టపోయి 38,684.72 పాయింట్ల వద్ద స్థిరపడింది.
జాతీయ స్టాక్ ఎక్స్చేంజి సూచీ-నిఫ్టీ 45.95 పాయింట్ల నష్టంతో11,598 పాయింట్ల వద్ద సెషన్ ముగించింది.
ఇదీ కారణం
నేడు జరిగిన ద్రవ్యపరపతి విధాన సమీక్షలో రెపో రేటును 25 బేసిస్ పాయింట్లు తగ్గించింది ఆర్బీఐ. ఇది మార్కెట్లకు కలిసొచ్చే విషయమే అయినా ప్రస్తుత ఆర్థిక సంవత్సరానికి వృద్ధి రేటు అంచనాలను 7.2 శాతానికి తగ్గించింది ఆర్బీఐ.
మిడ్సెషన్ వరకు మిశ్రమ ఫలితాల మధ్య సాగిన మార్కెట్లు... ఆ తర్వాత నష్టాల్లోకి జారుకున్నాయి. వీటికి తోడు ఈ ఏడాది సాధారణం కంటే తక్కువ వర్షపాతం ఉంటుందని 'స్కైమెట్' అంచనా వేసింది. ఈ అంశాలు మదుపరుల సెంటిమెంటును ప్రభావితం చేశాయి.
ఇంట్రాడే సాగిందిలా..
| సూచీ | గరిష్ఠం | కనిష్ఠం |
| సెన్సెక్స్ | 38,939.35 | 38,581.04 |
| నిఫ్టీ | 11,662.55 | 11,559.20 |
లాభానష్టాల్లోనివివే...
సెన్సెక్స్లో నేడు టాటా మోటర్స్ 2.49 శాతం, హీరో మోటర్స్ 2.13 శాతం, భారతీ ఎయిర్టెల్ 1.60 శాతం హెచ్డీఎఫ్సీ 1.44 శాతం, ఏషియన్పెయింట్స్ 1.41 శాతం, వేదాంత 0.70 శాతం లాభపడ్డాయి.
టీసీఎస్ అత్యధికంగా 3.17 శాతం నష్టపోయింది. ఈ వరుసలో హెచ్సీఎల్ టెక్ 2.24 శాతం, యస్ బ్యాంకు 2.05 శాతం, ఇండస్ఇండ్ బ్యాంకు 1.86 శాతం, రిలయన్స్ 1.51 శాతం, కొటక్ మహీంద్రా బ్యాంకు 1.08 శాతం మేర నష్టాలను మూటగట్టుకున్నాయి.
30 షేర్ల సెన్సెక్స్ ఇండెక్స్లో 13 షేర్లు లాభాలను నమోదు చేయగా... 17 షేర్లు నష్టాల్లో ముగిశాయి.
50 షేర్ల నిఫ్టీ ప్యాక్లో 23 షేర్లు లాభాలను, 27 షేర్లు నష్టాలను నమోదు చేశాయి.
