స్టాక్ మార్కెట్లు నేడు స్వల్ప లాభాలతో ముగిశాయి. సెషన్ ప్రారంభంలోనే అమ్మకాల ఒత్తిడికిలోనైన సూచీలు.. చివరకు తేరుకుని జీవిత గరిష్ఠాలను నమోదు చేశాయి.
బొంబాయి స్టాక్ ఎక్స్చేంజి సూచీ-సెన్సెక్స్ 66 పాయింట్ల లాభంతో 39,750 వద్ద స్థిరపడింది. జాతీయ స్టాక్ ఎక్స్చేంజి సూచీ-నిఫ్టీ 4 పాయింట్ల వృద్ధితో..11,929 వద్ద సెషన్ ముగించింది.
ఇంట్రాడే సాగిందిలా
స్వల్ప లాభాలతో సానుకూలంగా ప్రారంభమైన సెన్సెక్స్ 39,499 - 39,829 పాయింట్ల మధ్య కదలాడింది.
నిఫ్టీ నేటి ఇంట్రాడేలో 11,960 పాయింట్ల గరిష్ఠాన్ని తాకగా... ఓ దశలో 11, 865 పాయింట్ల కనిష్ఠానికి తగ్గింది.
విశ్లేషణ
మదుపరులు నేడు మిశ్రమంగా స్పందించారు. ఫలితంగా ప్రారంభం నుంచే సూచీలు స్వల్ప ఒడుదొడుకులు లోనయ్యాయి. ఆసియాలోని ఇతర ప్రధాన మార్కెట్ల నుంచి సానుకూల సంకేతాలతో మదుపరుల సెంటిమెంట్ బలపడింది. సుస్థిర విదేశీ పెట్టుబడులు నేటి లాభాలకు ప్రధాన కారణం.
లాభనష్టాల్లోనివి ఇవే..
ఎస్ బ్యాంకు అత్యధికంగా 4.06 శాతం లాభపడింది. కోల్ ఇండియా 2.72 శాతం, ఇన్ఫోసిస్ 2.47 శాతం, పవర్ గ్రిడ్ 1.90 శాతం, వేదాంత 1.68 శాతం, రిలయన్స్ 1.16 శాతం, టీసీఎస్ 1.03 శాతం లాభాలను ఆర్జించాయి.
హీరో మోటార్స్ 2.55 శాతం, బజాజ్ ఆటో 2.35 శాతం, భారతీ ఎయిర్టెల్ 1.43 శాతం, ఎల్ & టీ 1.19 శాతం, బజాజ్ ఫినాన్స్ 1.02 శాతం, ఎం & ఎం 0.84 శాతం నష్టాలను నమోదు చేశాయి.
రూపాయి, ముడి చమురు
రూపాయి నేడు 20 పైసలు నష్టపోయింది. డాలర్తో రూపాయి మారకం విలువ 69.71కి చేరింది.
ముడి చమురు ధరల సూచీ-బ్రెంట్ 0.33 శాతం పెరిగింది. అంతర్జాతీయ మార్కెట్లో బ్యారెల్ ముడి చమురు ధర 69 డాలర్లుగా ఉంది.
ఆసియాలోని ఇతర ప్రధాన మార్కెట్లన్నీ నేడు లాభాలతో ముగిశాయి.
ఇదీ చూడండి: కోలుకున్న పీఎన్బీ- 65% తగ్గిన నష్టాలు
