స్టాక్ మార్కెట్లు నేడు భారీ లాభాలతో ముగిశాయి. నవంబర్లో రిటైల్ ద్రవ్యోల్బణం మూడేళ్ల గరిష్ఠానికి చేరడం, అక్టోబర్లో పారిశ్రామికోత్పత్తి భారీగా క్షీణించడం వంటి ప్రతికూలతలున్నా మార్కెట్లు ముందుకే దూసుకుపోవడం గమనార్హం.
బొంబాయి స్టాక్ ఎక్స్చేంజి సూచీ-సెన్సెక్స్ 428 పాయింట్లు పుంజుకుంది.. చివరకు 41,010 వద్ద స్థిరపడింది. జాతీయ స్టాక్ ఎక్స్చేంజి సూచీ-నిఫ్టీ 115 పాయింట్ల లాభంతో తిరిగి 12,087 వద్దకు చేరింది.
లాభాలకు కారణాలివే..
అమెరికా-చైనా మధ్య వాణిజ్య యుద్ధానికి తాత్కాలికంగా తెరపడనుందన్న అంచనాలు అంతర్జాతీయంగా సానుకూలతలు పెంచాయి. 'చైనాతో అతి పెద్ద డీల్‌కు చాలా దగ్గరగా ఉన్నాం' అని ట్రంప్‌ ట్వీట్ చేయడం ఈ సానుకూలతలకు ప్రధాన కారణం.
బ్రిటన్ ప్రధానిగా బోరిస్ జాన్సన్ మరో సారి విజయం సాధించిన కారణంగా.. ఐరోపా సమాఖ్య నుంచి యూకే బయటకు రావడం ఖాయమైనట్లు అంచనాలు ఊపందుకున్నాయి. ఈ అంశాలన్నింటితో మదుపరుల సెంటిమెంట్ బలపడి కొనుగోళ్లకు మొగ్గుచూపారు.
ఇంట్రాడే సాగిందిలా..
సెన్సెక్స్ 41,055 పాయింట్ల గరిష్ఠాన్ని తాకగా.. 40,737 పాయింట్ల కనిష్ఠాన్ని నమోదు చేసింది.
నిఫ్టీ నేడు 12,099 పాయింట్ల అత్యధిక స్థాయి.. 12,024 పాయింట్ల అత్యల్ప స్థాయిల మధ్య కదలాడింది.
లాభనష్టాల్లోనివి ఇవే..
యాక్సిస్ బ్యాంక్ 4.21 శాతం, వేదాంత 3.75 శాతం, ఎస్బీఐ 3.39 శాతం, మారుతీ 3.20 శాతం, ఇండస్ఇండ్ బ్యాంక్ 3.07 శాతం లాభాలను ఆర్జించాయి.
భారతీ ఎయిర్టెల్ 1.98 శాతం, కోటక్ బ్యాంక్ 1.38 శాతం, బజాజ్ ఆటో 0.88 శాతం, ఏషియన్ పెయింట్స్ 0.31 శాతం, హెచ్డీఎఫ్సీ బ్యాంక్ 0.05 శాతం నష్టాలను నమోదు చేశాయి.
