స్టాక్ మార్కెట్లు నేడు మిశ్రమంగా ముగిశాయి. ఫెడ్ వడ్డీ రేట్లపై సానుకూల అంచనాలు ఉన్నప్పటికీ.. భారత్-అమెరికా, చైనా-అమెరికా మధ్య కొనసాగుతున్న వాణిజ్య యుద్ధ భయాలు మదుపరుల సెంటిమెంట్ను ప్రభావితం చేశాయి. ఐటీ రంగ షేర్లు రాణించగా.. ఆర్థిక, వాహన రంగం షేర్లు డీలా పడ్డాయి.
బొంబాయి స్టాక్ ఎక్స్చేంజి సూచీ-సెన్సెక్స్ 66 పాయింట్లు బలపడింది. చివరకు 39,113 వద్ద స్థిరపడింది. జాతీయ స్టాక్ ఎక్స్చేంజి సూచీ-నిఫ్టీ 11,691 పాయింట్ల వద్ద ఫ్లాట్గా ముగిసింది.
ఇంట్రాడే సాగిందిలా...
భారీ లాభాలతో ప్రారంభమైన సెన్సెక్స్... మిడ్ సెషన్లో అమ్మకాల ఒత్తిడికి లోనైంది. సెషన్ మొత్తం 38,881-39,436 పాయింట్ల మధ్య కదలాడింది ఈ సూచీ.
నిఫ్టీ నేడు 11,802 పాయింట్ల గరిష్ఠాన్ని తాకగా.. ఓ దశలో 11,625 పాయింట్ల కనిష్ఠానికి తగ్గింది.
లాభనష్టాల్లోనివి ఇవే..
టాటా స్టీల్ 4.60 శాతం, కోటక్ బ్యాంకు 2.44 శాతం, ఎన్టీపీసీ 1.58 శాతం, హెచ్డీఎఫ్సీ 1.11 శాతం, పవర్ గ్రిడ్ 1.06 శాతం, ఓఎన్జీసీ 0.75 శాతం లాభాలను ఆర్జించాయి.
ఎస్ బ్యాంకు 5.54 శాతం, టాటా మోటార్స్ 2.31 శాతం, హీరో మోటార్స్ 1.99 శాతం, ఎం&ఎం 1.71 శాతం, భారతీ ఎయిర్టెల్ 1.68 శాతం నష్టాలను నమోదుచేశాయి.
రూపాయి, ముడి చమురు
రూపాయి నేడు ఫ్లాట్గా ముగిసింది. డాలర్తో రూపాయి మారకం విలువ 69.70 గా ఉంది.
ముడి చమురు ధరల సూచీ-బ్రెంట్ 0.55 శాతం తగ్గింది. అంతర్జాతీయ మార్కెట్లో బ్యారెల్ ముడి చమురు ధర 61.80 డాలర్లకు చేరింది.
ఇతర మార్కెట్లు ఇలా...
ఆసియాలోని ఇతర ప్రధాన మార్కెట్లలో కొనుగోళ్ల ర్యాలీ కొనసాగింది. హాంకాంగ్ సూచీ-హాంగ్ సెంగ్ 2.56 శాతం వృద్ధి చెందింది. షాంఘై సూచీ 0.96 శాతం, జపాన్ సూచీ-నిక్కీ 1.72 శాతం, కొరియా సూచీ-కోస్పీ 1.24 శాతం లాభపడ్డాయి.
ఇదీ చూడండి: అంకురాలకు వాట్సాప్ ఆర్థిక ప్రోత్సాహం
