దేశంలోని ప్రధాన టెలికాం సంస్థలకు సుప్రీం కోర్టులో గట్టిఎదురుదెబ్బ తగిలింది. టెలికాం సంస్థల నుంచి రూ.92,000 కోట్ల.. సర్దుబాటు చేసిన స్థూల రాబడి(ఏజీఎర్)ను తిరిగి రాబట్టేందుకు కేంద్రప్రభుత్వానికి సుప్రీం కోర్టు అనుమతిచ్చింది.
జస్టిస్ అరుణ్ మిశ్రా నేతృత్వంలోని ముగ్గురు సభ్యుల ధర్మాసనం.. సర్దుబాటు చేసిన స్థూల ఆదాయంపై టెలికాం శాఖ నిర్వచనాన్ని సమర్థించింది.
"టెల్కోల లైసెన్సులు రద్దు చేసేందుకు టెలికాం శాఖకు మేము అనుమతిస్తున్నాము. "
- సుప్రీం ధర్మాసనం తీర్పు
ఈ అంశాన్ని సవాలు చేస్తూ వివిధ టెల్కోలు దాఖలు చేసిన పిటిషన్లను తిరస్కరిస్తున్నట్లు అత్యున్నత న్యాయస్థానం పేర్కొంది. సర్వీస్ ప్రొవైడర్లు నిర్ణీత గడువులోగా అపరాధ రుసుములు చెల్లించాల్సిందేనని స్పష్టం చేసింది. మరోసారి ఈ అంశంపై విచారణ ఉండబోదని తేల్చిచెప్పింది.
ఎవరికి ఎంత ఫైన్ అంటే...
టెలికాం శాఖ ప్రకారం.. రూ.21,682.13 కోట్ల లైసెన్స్ రుసుము బకాయితో ఎయిర్టెల్ మొదటి స్థానంలో ఉంది. వొడాఫోన్ రూ.16,456.47 కోట్లు, రిలయన్స్ కమ్యూనికేషన్ 16,456.47 కోట్ల బకాయిలతో తర్వాతి స్థానాల్లో ఉన్నాయి.
ప్రభుత్వ రంగ టెలికాం సంస్థ బీఎస్ఎన్ఎల్ 2,098.72 కోట్లు, ఎంటీఎన్ఎల్ రూ.2,537.48 కోట్లు బకాయి పడ్డాయి. అన్ని సంస్థలు కలిపి రూ.92,641.61 కోట్లు చెల్లించాల్సి ఉందని టెలికాం శాఖ తెలిపింది.
కోర్టు తీర్పుపై నిరాశ..
టెల్కోల నుంచి రూ.92,000 కోట్లు వసూలు చేయాలని సుప్రీం ఇచ్చిన తీర్పుపై ఎయిర్టెల్ స్పందించింది. న్యాయస్థానం నిర్ణయంతో ఇప్పటికే ఒత్తిడిలో ఉన్న సంస్థలపై మరింత భారం పెరుగుతుందని ఆవేదన వ్యక్తంచేసింది. కోర్టు నిర్ణయం తమను తీవ్ర నిరాశకు గురిచేసినట్లు వెల్లడించింది.
15 ఏళ్లుగా టెలికాం రంగంలో ఉన్న టెలికాం సంస్థలపై ఈ తీర్పు ప్రభావం పడుతుందని.. ప్రస్తుతం రెండే ప్రైవేటు సంస్థలు మిగిలాయని పేర్కొంది.
ఈ అంశాన్ని పునఃసమీక్షించాలని, టెల్కోలు ఆర్థిక ఇబ్బందుల్లో చిక్కుకోకుండా చూడాలని ప్రభుత్వానికి విన్నవించింది ఎయిర్టెల్.
ఇదీ చూడండి: ఇన్ఫీ గోల్మాల్ ఆరోపణలపై దర్యాప్తులు ముమ్మరం
