భారతీయ స్టేట్ బ్యాంకు(ఎస్బీఐ) తన ఉద్యోగుల కోసం స్వచ్ఛంద పదవీ విరమణ పథకాన్ని(వీఆర్ఎస్) తీసుకురానుంది. ఈ 'సెకండ్‌ ఇన్నింగ్స్‌ టాప్‌-వాలంటరీ రిటైర్‌మెంట్‌ స్కీమ్-2020' (ఎస్‌ఐటీవీఆర్‌ఎస్‌-2020) ద్వారా మానవ వనరులు, వ్యయాలను సమర్థంగా వినియోగించుకోవాలని భావిస్తున్నట్లు బ్యాంకు ఇటీవలే పేర్కొంది. ఈ వీఆర్ఎస్ స్కీమ్ కోసం కొన్ని నియమ, నిబంధనలు అర్హతగా పెట్టింది. వాటికి దాదాపు 30వేల190మంది ఉద్యోగులు అర్హత సాధించినట్లు సంస్థ తెలిపింది. ఈ వీఆర్ఎస్ స్కీమ్ డ్రాఫ్ట్ ఇప్పటికే సిద్ధమవగా.. దీనికి బోర్డు ఆమోద ముద్ర వేయాల్సి ఉందని సమాచారం.
ప్రతి ఏటా అమలు...!
డిసెంబరు 1 నుంచి ఫిబ్రవరి చివరి వరకు ఏటా మూడు నెలల పాటు.. ఈ స్కీమ్ అమల్లో ఉంటుంది. ప్రతిపాదిత అర్హత ప్రమాణాల ప్రకారం.. మొత్తం 11,565 మంది అధికారులు(జూనియర్‌ మేనేజ్‌మెంట్‌ గ్రేడ్‌ స్కేల్‌-1 నుంచి టాప్‌ ఎగ్జిక్యూటివ్‌ గ్రేడ్‌ స్పెషల్‌ స్కేల్‌-1 వరకు); 18625 మంది సిబ్బంది(క్లరికల్‌, సబ్‌ స్టాఫ్‌)కి ఈ పథకం కింద అర్హత ఉంటుంది.
ఒక వేళ ఈ పథకం కింద 30 శాతం మంది పదవీ విరమణను ఎంచుకుంటే.. జులై 2020 నెల వేతనం ప్రకారం.. బ్యాంకుకు రూ.1,662.86 కోట్ల మేర నికరంగా మిగులుతుంది.
ఈ ఏడాది మార్చి చివరికి ఎస్బీఐ సిబ్బంది సంఖ్య 2,49,448గా ఉంది. సిబ్బంది వ్యయాలను తగ్గించుకుని.. ఉత్పాదకతను మెరుగుపరచుకోవాలని భావిస్తున్నట్లు ఎస్బీఐ స్పష్టం చేసింది. గతేడాది 2.57 లక్షల సిబ్బంది ఉండటం గమనార్హం.
ఇవీ అర్హత నిబంధనలు..
- ఎస్బీఐ (విలీనం అయిన ఎస్బీఐ అనుబంధ బ్యాంకులు, భారతీయ మహిళా బ్యాంకు సిబ్బంది సైతం)లోని అందరు శాశ్వత అధికారులు, సిబ్బందికి ఈ వీఆర్ఎస్ వర్తిస్తుంది.
- దరఖాస్తు చేసే నాటికి 25 ఏళ్ల సర్వీసు, 55 ఏళ్ల వయసును పూర్తి చేసి ఉండాలి. మూడు లేదా నాలుగు ప్రమోషన్‌ అవకాశాలను కోల్పోయిన అధికారులకు ఇది వర్తిస్తుంది.
- వీఆర్ఎస్ను ఎంచుకునే ఉద్యోగులకు మిగిలిన సర్వీసుకు గాను వేతనంలో 50శాతం వరకు ఎక్స్‌ గ్రేషియాగా అందిస్తారు. (చివరిగా వేతనం తీసుకున్న నాటి నుంచి గరిష్ఠంగా 18 నెలలు).
వీఆర్ఎస్ తీసుకున్నవారికి గ్రాట్యుటీ, పెన్షన్, ప్రావిడెంట్ అండ్ మెడికల్ బెనిఫిట్స్ ఉంటాయి.
మళ్లీ విధుల్లోకి రావొచ్చు...!
ఈ స్కీమ్ ఆధారంగా రిటైర్ అయిన సిబ్బంది మళ్లీ సంస్థలో పనిచేయవచ్చు. అయితే రెండేళ్ల తర్వాత మాత్రమే ఇది సాధ్యపడుతుంది. 2017లో ఎస్బీఐలో కలిసిన ఐదు సంస్థలు కూడా విలీనానికి ముందు వీఆర్ఎస్ను ప్రకటించాయి. 2001 నుంచి ఎస్బీఐ వీఆర్ను అమలు చేస్తోంది. అయితే బ్యాంక్ యూనియన్లు మాత్రం ఈ స్కీమ్పై ఆసక్తి కనబర్చట్లేదు. కరోనాతో ఇబ్బందులు పడుతున్న సమయంలో సంస్థ నిర్ణయాన్ని యూనియన్లు వ్యతిరేకిస్తున్నాయి.
