దక్షిణ కొరియా ఎలక్ట్రానిక్ దిగ్గజం శాంసంగ్ మరో కొత్త రకం స్మార్ట్ఫోన్ను తీసుకురానున్నట్లు ఇటీవల ప్రకటించింది. అడ్డంగా మడతబెట్టే ఫోన్లను ఇప్పటికే మార్కెట్లోకి తెచ్చిన శాంసంగ్.. ఇప్పుడు నిలువుగా మడతబెట్టే ఫోన్లను ఆవిష్కరించేందుకు కృషి చేస్తోంది. ఈ విషయాన్ని కంపెనీ డెవలపర్ల సదస్సులో శాంసంగ్ వెల్లడించింది.
మడత ఫోన్ల రారాజుగా..
గతంలో మడతఫోన్లు తీసుకురానున్నట్లు చాలా కంపెనీలు ప్రకటించాయి. వీటిలో ముఖ్యంగా చైనాకు చెందిన స్మార్ట్ఫోన్ తయారీ దిగ్గజాలు హువావే, ఒప్పో, వీవో ఉన్నాయి. అయితే ఈ సంస్థలు వాటి మడత ఫోన్లకు ఇంకా మెరుగులు దిద్దుతూ... మార్కెట్లోకి ఆ మోడళ్లను విడుదల చేయలేదు. అదే సమయంలో మడత ఫోన్ల ప్రకటన చేసిన శాంసంగ్.. గెలాక్సీ ఫోల్డ్ పేరుతో మార్కెట్లోకి ఆ మోడల్ను విడుదల చేసింది. ఫోల్డబుల్ స్మార్ట్ఫోన్లను విక్రయించిన తొలి సంస్థగా మార్కెట్లో పేరు సంపాదించింది.
ఇదే ఉత్సాహంతో నిలువుగా మడతబెట్టే స్మార్ట్ఫోన్ల ప్రాజెక్ట్ను శాంసంగ్ తెరపైకి తెచ్చింది. ఈ ప్రాజెక్ట్పై పని చేస్తున్నట్లు వెల్లడించిన శాంసంగ్.. వర్టికల్ ఫోల్డబుల్ ఫోన్కు సంబంధించిన వివరాలేవీ వెల్లడించలేదు.
అయితే శాంసంగ్ వర్టికల్ ఫోల్డ్పై వదంతులు మాత్రం ఊపందుకున్నాయి. ఈ కొత్త మోడల్ను 'శాంసంగ్ డబ్ల్యూ20 5జీ'గా వచ్చే ఏడాది మార్కెట్లోకి తెచ్చే అవకాశాలున్నాయని గుసగుసలు వినిపిస్తున్నాయి. మరికొన్ని టెక్ వార్తా సంస్థలు.. గెలాక్సీ ఫోల్డ్ 2 పేరుతో కొత్త మోడల్ను ఆవిష్కరించే అవకాశముందని అంటున్నాయి.
ఇదీ చూడండి: రైవసీకి పెద్దపీట.. గూగుల్ సరికొత్త ఆలోచన
