మొబైల్ ప్రేమికులను ఊరిస్తున్న గెలాక్సీ ఫోల్డబుల్ (మడత) ఫోన్లను మార్కెట్లోకి తెచ్చేందుకు సిద్ధమైంది ఎలక్ట్రానిక్ దిగ్గజం శాంసంగ్. సెప్టెంబర్ నుంచి ఎంపిక చేసిన మార్కెట్లలో ఈ ఫోన్లను అందుబాటులోకి తీసుకురానున్నట్లు శాంసంగ్ తెలిపింది.
మొదట ఏప్రిల్ 26నే మార్కెట్లోకి ఈ ఫోన్ను విడుదల చేయాలని శాంసంగ్ భావించింది. అయితే టెస్టింగ్ దశలో డిస్ప్లేపై భారీ ఎత్తున ఫిర్యాదులు వెల్లువెత్తాయి. ఈ కారణంగా విడుదలను వాయిదా వేసింది.
ప్రస్తుతం ఈ మోడల్కు తుది మెరుగులు దిద్దుతోంది శాంసంగ్. ముఖ్యంగా 'ఇన్ఫినిటీ డిస్ప్లే' విషయంలో కీలక మార్పులు చేసినట్లు శాంసంగ్ ఓ ప్రకటనలో తెలిపింది. ఫోన్ మడతపెట్టడంలో సహకరించే కీలు భాగాలకు ఇరువైపులా (పైనా, కింద) అదనపు రక్షణ కవచాలను ఏర్పాటు చేసినట్లు వెల్లడించింది. యూజర్లకు ప్రత్యేక ఫోల్డబుల్ అనుభూతిని ఇచ్చేందుకు మార్పులు చేసినట్లు పేర్కొంది.
ఎంపిక చేసిన మార్కెట్లలో భారత్, దక్షిణ కొరియా, జపాన్ సహా పలు ఇతర మార్కెట్లు ఉన్నట్లు తెలుస్తోంది. భారత్లోనే ఈ ఫోన్ ముందుగా అందుబాటులోకి వచ్చే అవకాశం ఉంది.
గెలాక్సీ ఫోల్డ్ ఫీచర్లు:
- 16ఎంపీ+12ఎంపీ+12ఎంపీలతో వెనుకవైపు 3 కెమెరాలు
- 10 ఎంపీల సెల్ఫీ కెమెరా
- 16జీబీ ర్యామ్/512 జీబీ ఆన్బోర్డ్ స్టోరేజి
- క్వాల్కామ్ స్నాప్డ్రాగన్ 855 ఆక్టా-కోర్ ప్రాసెసర్
ఇతర కీలక ఫీచర్లను సెప్టెంబర్లో మార్కెట్లోకి విడుదల సందర్భంగా వెల్లడించనుంది శాంసంగ్.
ఇదీ చూడండి: ఆగస్టు 1న హువావే "వై9 ప్రైమ్ 2019"
