'జియో మార్ట్​ అండతో 'ఫ్యూచర్'​ మెరుగు'

కరోనా విజృంభణతో మందకొడిగా సాగిన తమ వ్యాపారం త్వరలోనే పుంజుకుంటుందని ఫ్యూచర్​ గ్రూపు వ్యవస్థాపకుడు, సీఈఓ కిశోర్​ బియానీ ఆశాభావం వ్యక్తం చేశారు. వ్యాపార విస్తరణ, అమెజాన్​తో కొనసాగుతున్న వివాదం, జియోతో ఒప్పందం వంటి కీలక అంశాలపై ఆయన పీటీఐ వార్తా సంస్థతో ప్రత్యేకంగా మాట్లాడారు.

కరోనాతో గత సంవత్సర కాలంగా మందకొడిగా సాగిన అమ్మకాలు జనవరి చివరి నాటికి సాధారణ స్థాయికి చేరుకుంటాయని ఫ్యూచర్ గ్రూప్ అంచనా వేస్తోంది. రిటైల్ రంగంలో అమ్మకాలు పుంజుకుంటాయని ఆ సంస్థ సీఈఓ కిశోర్​​ బియానీ తెలిపారు.

రిలయన్స్​తో కుదుర్చుకున్న ఒప్పందం(రూ.24,731కోట్లు) కారణంగా జియో మార్ట్ నుంచి వస్తున్న ఆర్డర్లు ఫ్యూచర్​ గ్రూపు వ్యాపార వృద్ధికి తోడ్పడ్డాయని తెలిపారు. త్వరలోనే కరోనాకు ముందున్న పరిస్థితులను చేరతామని ఆశాభావం వ్యక్తం చేశారు.

బిగ్ ​బజార్​, ఎఫ్​బీబీ, సెంట్రల్​, నీలగిరీస్​ వంటి ఫ్యూచర్​ గ్రూప్​ రిటైల్​ స్టోర్లలో 60 శాతం అమ్మకాలు పుంజుకున్నాయి. త్వరలోనే కరోనాకు ముందున్న అమ్మకాలు సాధిస్తాం . వ్యాపారాల్లో క్రమంగా వృద్ధి కనిపిస్తోంది. స్టాక్ మార్కెట్లలోనూ మా షేరు ధర 80శాతం పెరిగింది.

-కిశోర్​ బియానీ, ఫ్యూచర్​ గ్రూప్ అధినేత

డిజిటల్​ విధానంలో వ్యాపారం..

సామాజిక దూరం నిబంధనలతో తమ వ్యాపారం పూర్తి స్థాయిలో సాగట్లేదని.. కరోనా టీకా అందరికీ చేరేవరకు 100శాతం లాభాలు ఆశించలేమని బియానీ అభిప్రాయపడ్డారు. 'పికప్​ ఎట్​ స్టోర్స్' పేరిట డిజిటల్​ రూపంలో కస్టమర్లను చేరుతున్నామని వివరించారు. జనవరి 26న 'సబ్​ సే సస్తా దిన్' రోజు పెద్ద ఎత్తున అమ్మకాలు జరుగుతాయని ఆశిస్తున్నామన్నారు.

చిన్న నగరాలకూ 'ఫ్యూచర్​'

బిగ్​బజార్​ హైపర్​ మార్కెట్ పేరిట లఖ్​నవూలో ఏర్పాటైన స్టోర్లను మధ్యశ్రేణి నగరాలకూ విస్తరించే యోచనలో ఉన్నట్టు వెల్లడించారు. వీటిల్లో దుస్తులు, ఎఫ్‌ఎంసీజీ ఉత్పత్తుల విక్రయాలు అధికంగా ఉండేలా ప్రణాళికలు రూపొందిస్తున్నామని తెలిపారు. జియోతో పాటు ఫ్యూచర్​ గ్రూప్​ వినియోగదారుల నుంచి క్రమంగా పెరుగుతున్న ఆర్డర్ల నేపథ్యంలో సప్లయి చెయిన్​ను పటిష్ఠ పరచుకోవాల్సిన అవసరాన్ని ఉద్యోగులకు రాసిన మెయిల్​లో బియానీ ప్రస్తావించారు.

ఫ్యూచర్​పై కోర్టుకు అమెజాన్​..

రిలయన్స్​-ఫ్యూచర్​ గ్రూపు ఒప్పందానికి నియంత్రణా సంస్థల అనుమతులు రావాల్సి ఉందని.. ఒప్పందం జరిగి తీరుతుందని స్పష్టం చేశారు బియానీ. అమెజాన్​ వ్యవహారంపై ఎక్కువ సమయం వేచి చూడాలనుకోవట్లేదని వివరించారు. సెబీ అనుమతి పొందిన వెంటనే రుణదాతలు, వాటాదారుల ఆమోదం కోసం నేషనల్​ కంపెనీ లా ఆఫ్​ ట్రైబ్యునల్ (ఎన్​సీఎల్​టీ)లో దరఖాస్తు చేస్తామని వివరించారు. ఈ ప్రక్రియకు 45-60 రోజులు సమయం పడుతుందని చెప్పారు.

గత ఏడాది ఆగస్టులో చేసుకున్న ఈ ఒప్పందంపై సింగపూర్ ఇంటర్నేషనల్ ఆర్బిట్రేషన్ కోర్టులో అమెజాన్​ సవాలు చేసింది. ఫ్యూచర్ గ్రూపు లిమిటెడ్‌లో 49 శాతం కొనుగోలుకు 2019లో అమెజాన్ ఒక అంగీకారానికి వచ్చినా అది ముందుకు సాగలేదు. ఫ్యూచర్​ గ్రూపు కంపెనీ మొత్తంగా రూ.20,000కోట్ల రుణభారంతో ఉంది.

ఇదీ చదవండి: 'మొత్తం మీరే చేశారు'.. అమెజాన్​పై బియానీ ఫైర్