రిజర్వు బ్యాంకు కీలక వడ్డీ రేట్లను మరోసారి తగ్గించే అవకాశముందని ఆర్థికవేత్తలు అంచనా వేస్తున్నారు. ద్రవ్యోల్బణం అంచనాలు దాటకుండా ఉండేందుకు అక్టోబర్ 4న వెలువడనున్న ప్రకటనలోనూ.. కీలక వడ్డీ రేట్ల కోత ఉండొచ్చని అంటున్నారు.
ఇటీవల వెలువడిన గణాంకాల ప్రకారం ఆగస్టులో రిటైల్ ద్రవ్యోల్బణం 3.21 శాతానికి పెరిగింది. పారిశ్రామికోత్పత్తి 4.3 శాతానికి తగ్గింది. దేశంలో ఆర్థిక మందగమనం తీవ్రమవుతోందనే వాదనకు ఈ గణాంకాలు బలాన్ని చేకూరుస్తున్నాయి. ఈ నేపథ్యంలో వడ్డీ రేట్ల కోతపై అంచనాలు పెరిగినట్లు పలు జాతీయ, అంతర్జాతీయ బ్రోకరేజీ సంస్థలు తెలిపాయి.
"ద్రవ్యోల్బణం పెరగటం, పారిశ్రమికోత్పత్తి భారీగా తగ్గడం కారణంగా అక్టోబర్లో జరిగే ద్వైమాసిక ద్రవ్యపరపతి విధాన సమీక్షలో ఆర్బీఐ కీలక వడ్డీ రేట్లు తగ్గించే అవకాశముంది. దాదాపు 40 బేసిస్ పాయింట్ల మేర రెపో కోత ఉండొచ్చు."
- నోమురా, ఆర్థిక సేవల సంస్థ-జపాన్
పెట్టుబడులను ప్రోత్సహించేలా రేట్ల కోత అవసరమని బ్యాంక్‌ ఆఫ్‌ అమెరికా మెరిల్‌ లించ్‌ అభిప్రాయపడింది. అక్టోబర్లో 50 బేసిస్ పాయింట్ల వరకు రేట్ల కోత ఉండొచ్చని అంచనా వేసింది.
దేశీయ బ్రోకరేజ్‌ సంస్థ కోటక్‌ సెక్యూరిటీస్‌ ఇదే అభిప్రాయం వ్యక్తం చేసింది. 2019-2020 ఆర్థిక సంవత్సరం చివరినాటికి మరో 75 బేసిస్ పాయింట్ల వరకు వడ్డీ రేట్లు తగ్గించే అవకాశముందని పేర్కొంది.
ద్రవ్యోల్బణం, పారిశ్రామిక వృద్ధిని పరిగణనలోకి తీసుకుని ఆర్బీఐ వడ్డీరేట్లు నిర్ణయిస్తుంది. 2019 సంవత్సరంలో ఇప్పటివరకు జరిగిన నాలుగు ద్వైమాసిక సమీక్షల్లోనూ రేట్లు తగ్గించింది ఆర్బీఐ. వరుస కోతతో రెపో రేటు ప్రస్తుతం 5.40 శాతం వద్ద ఉంది.
ఇదీ చూడండి: రివర్స్ గేర్లో వెళ్తున్న 'ఆటో'కు రైల్వే చేయూత
