వీడియో స్ట్రీమింగ్ దిగ్గజం 'నెట్ఫ్లిక్స్' వినియోగదారులను భారీగా పెంచుకునేందుకు ప్రణాళికలు వేస్తోంది. ప్రస్తుతం ఉన్న వీడియో ఆన్ డిమాండ్ సంస్థలకు గట్టిపోటీని ఇచ్చేందుకు సిద్ధమైంది. ఇందుకోసం రూ.250 నెలవారీ చందాతో నెట్ఫ్లిక్స్ సభ్యత్వాన్ని ఇవ్వనున్నట్లు వెల్లడించింది. ఈ సభ్యత్వం ద్వారా ఒక సారి కేవలం ఒక మొబైల్లో మాత్రమే కంటెంట్ను చూసేందుకు అనుమతించనున్నట్లు నెట్ఫ్లిక్స్ పేర్కొంది. ప్రస్తుతం నెట్ఫ్లిక్స్ సాధారణ చందా నెలకు రూ.500గా ఉంది. ఈ ఏడాది మూడో త్రైమాసికంలో రూ.250 చందా ప్లాన్ను అందుబాటులోకి తీసుకురానున్నట్లు తెలిపింది నెట్ఫ్లిక్స్.
"ఈ ఏడాది మూడో త్రైమాసికంలో ఈ చౌక ధర ప్లాన్ను ఆవిష్కరించనున్నాం. దీని ద్వారా భారత్లో పెద్ద సంఖ్యలో యూజర్లకు నెట్ఫ్లిక్స్ను పరిచయం చేస్తామని భావిస్తున్నాం."
-నెట్ఫ్లిక్స్
నెట్ ఫ్లిక్స్కు 190 దేశాల్లో 148 మిలియన్లకు పైగా చందాదార్లు ఉన్నట్లు పేర్కొంది.
'భారత్లో మొబైల్ డాటా చార్జీలు తక్కువగా ఉన్నాయి. ముఖ్యంగా జియో వచ్చిన తర్వాత డాటా వినియోగం భారీగా పెరిగింది. ఈ అనుకూలతలను అందిపుచ్చుకుని కంపెనీ సేవలను విస్తరించాలని భావిస్తున్నాం' అని నెట్ఫ్లిక్స్ ఉత్పత్తుల ప్రధానాధికారి గ్రెగ్ పీటర్స్ తెలిపారు.
ప్రస్తుతం వీడియో ఆన్ డిమాండ్లో సేవలందించే సంస్థల్లో అమెజాన్ ప్రైమ్, హాట్ స్టార్, యూట్యూబ్ సహా యప్ టీవీ, హంగామా, ఏఎల్టీ బాలాజీ వంటి స్థానిక సంస్థల నుంచి గట్టిపోటీని ఎదుర్కొంటోంది నెట్ ఫ్లిక్స్.
ఇదీ చూడండి: ట్విట్టర్పై యూజర్ల అసంతృప్తి ఎందుకో తెలుసా?
