మైక్రోసాఫ్ట్ నుంచి రెండు తెరల మడత స్మార్ట్ఫోన్లను తీసుకొస్తున్నట్లు తెలిపారు సంస్థ ఉన్నతాధికారులు. సర్ఫేస్ డ్యుయో, సర్ఫేస్ నియో పేరుతో వచ్చే ఏడాది చివరికి ఇవి అందుబాటులోకి వస్తాయని అమెరికా న్యూయార్క్లో జరిగిన కార్యక్రమంలో చెప్పారు. మడతపెట్టి ఉన్నపుడు వీటి పరిమాణం 5.6 అంగుళాలు. తెరిచినప్పుడు 8.3 అంగుళాలకు పెరుగుతుంది.
ఈ రెండు తెరల ఫోన్లో ఒకేసారి రెండు యాప్లను ఓపెన్ చేయవచ్చు. లేదా ఒకే యాప్నూ వాడవచ్చు. ఆ సమయంలో మరో తెర కీబోర్డ్గా పనిచేస్తుంది.
ఇటీవలే గేలాక్సీ సిరీస్తో మడత ఫోన్లను విడుదల చేసింది మొబైల్ దిగ్గజ సంస్థ శాంసంగ్. ఇప్పుడు వీటికి పోటీగా రెండు తెరల మడత ఫోన్తో రాబోతోంది మైక్రోసాప్ట్.
గతంలో మైక్రోసాఫ్ట్ నుంచి వచ్చిన స్మార్ట్ ఫోన్లలో విండోస్ ఆపరేటింగ్ సిస్టమ్ను వినియోగించారు. కొత్తగా రూపొందిస్తున్న రెండు తెరల ఫోన్లలో ఆండ్రాయిడ్ ఆపరేటింగ్ సిస్టమ్ను ఉపయోగిస్తున్నారు.
వినియోగదారులకు అత్యాధునిక సదుపాయలతో అత్యున్నత సాంకేతిక విలువలు గల డివైస్లను అందుబాటులోకి తీసుకురావడమే సంస్థ లక్ష్యమని తెలిపారు మైక్రోసాఫ్ట్ సీఈఓ సత్య నాదెళ్ల.
సర్ఫేస్ సిరీస్ నుంచి కొత్త మోడల్స్
ఈ కార్యక్రమంలో సర్ఫేస్ సిరీస్ నుంచి మార్కెట్లోకి సరికొత్త ల్యాప్టాప్లు, ట్యాబ్లు, కంప్యూటర్లను విడుదల చేసింది మైక్రోసాఫ్ట్. యాపిల్, అమెజాన్, గూగుల్కు పోటీగా వైర్లెస్ ఇయర్ బడ్స్ను తీసుకువచ్చింది. వీటి ప్రారంభ ధర 249 డాలర్లు.
సర్ఫేస్ ల్యాప్టాప్ 3: ఈ కొత్త మోడల్ ల్యాప్టాప్.. 13 అంగుళాలు, 15 అంగుళా వేరియెంట్స్తో అందుబాటులో ఉంది. ధర 999 డాలర్లు, 1199 డాలర్లు.
సర్ఫేస్ ప్రొ 7, సర్ఫేస్ ప్రొ ఎక్స్ ల్యాప్టాప్లను అత్యాధునిక ఫీచర్స్తో మొబైల్ ఫోన్ అనుభూతి పొందేలా రూపొందించారు. ప్రొ7 ధర 749 డాలర్లు. ప్రొ-ఎక్స్ ధర 999డాలర్లు.
ఇదీ చూడండి: వాణిజ్య యుద్ధ భయాలతో నష్టాల్లో మార్కెట్లు
