పండుగ సీజన్లో కార్లు, ఇతర ప్రయాణ వాహనాల విక్రయాలు భారీగా పెరిగాయి. మారుతీ సుజూకీ ఇండియా, హ్యుందాయ్ మోటర్స్ ఇండియాలు జోరు కనబరిచాయి. అక్టోబర్లో ఏకంగా రెండంకేల వృద్ధిని నమోదు చేశాయి. వాటితో పాటు హోండా కార్స్ ఇండియా, టొయోటా కిర్లోస్కర్ మోటర్స్, మహీంద్రా అండ్ మహీంద్రాలు కూడా దేశీయ ప్రయాణ వాహనాల విక్రయాల్లో వృద్ధి నమోదు చేశాయి.
మారుతీ సుజూకీ..
దేశీయ అతిపెద్ద కార్ల తయారీ సంస్థ మారుతీ సుజూకీ ఇండియా (ఎంఎస్ఐ) 2019, అక్టోబర్(1,44,277 యూనిట్స్) తో పోలిస్తే.. ఈ ఏడాది అక్టోబర్లో 19.8 శాతం వృద్ధితో 1,72,862 వాహనాలు విక్రయించినట్లు ప్రకటించింది. అయితే.. సంస్థ చిన్న కార్లు ఆల్టో, ఎస్-ప్రెస్సో వంటి విక్రయాల్లో స్వల్ప క్షీణత నమోదైంది. గత ఏడాది అక్టోబర్లో 28,537 యూనిట్లు విక్రయించగా.. ఈసారి 28,462 యూనిట్లు మాత్రమే అమ్ముడయ్యాయి.
స్విఫ్ట్, సెలేరియో, ఇగ్నైస్, బలేనో, డిజైర్ వంటి కార్లు 19.2 శాతం వృద్ధితో 95,067 వాహనాలు అమ్ముడయ్యాయి. యుటిలిటీ వెహికిల్స్లో విటారా బ్రెజా, ఎస్-క్రాస్, ఎర్టిగాలు కూడా 9.9 శాతం వృద్ధితో 25,396 యూనిట్లు విక్రయమయ్యాయి.
హ్యుందాయ్ మోటర్స్..
హ్యుందాయ్ మోటర్స్ దేశీయ మార్కెట్లో.. గతంలో ఎన్నడూ లేని విధంగా అక్టోబర్లో రికార్డు స్థాయిలో అమ్మకాలు నమోదు చేసింది. 2019, అక్టోబర్ (50,010 యూనిట్లు)తో పోలిస్తే ఈ ఏడాది అక్టోబర్లో 13.2 శాతం వృద్ధితో 56,605 వాహనాలు విక్రయించింది. 2018, అక్టోబర్లో అత్యధికంగా 52,001 యూనిట్లను విక్రయించగా.. తాజాగా ఆ రికార్డును తిరగరాసింది.
వివిధ సంస్థల విక్రయాలు ఇలా ఉన్నాయి.
| సంస్థ | 2020, అక్టోబర్ | 2019, అక్టోబర్ | వృద్ధి (శాతంలో) |
| మారుతీ | 1,72,862 | 1,44,277 | 19.8 |
| హ్యుందాయ్ | 56,605 | 50,010 | 13.2 |
| హోండా | 10,836 | - | 8.3 |
| టొయోటా | 12,373 | 11,866 | 4.27 |
| ఎంఅండ్ఎం | 18,622 | 18,460 | 1 |
| ఎంజీ | 3,750 | 3,536 | 6 |
ద్విచక్ర వాహనాల్లో..
ద్విచక్రవాహనాల విక్రయాల్లో హీరో మోటోకార్ఫ్ జోరు కనబరిచింది. అక్టోబర్లో రికార్డు స్థాయిలో 8,06,848 యూనిట్లు విక్రయించింది. 2019, అక్టోబర్ ( 5,99,248 యూనిట్లు) తో పోలిస్తే 34.64 శాతం వృద్ధి నమోదు చేసింది.
మరోవైపు.. రాయల్ ఎన్ఫీల్డ్ 7 శాతం వృద్ధితో 62,858 యూనిట్లు విక్రయించినట్లు సంస్థ ప్రకటించింది.
ఇదీ చూడండి: దసరా వేళ కార్ల విక్రయాలు భళా
