కరోనా నేపథ్యంలో వ్యక్తిగత వాహనాలు ఉండాలన్న ప్రజల ఆలోచన, డిమాండ్ పెరుగదలతో ఈ ఏడాది మార్చి నెలలో ప్రధాన ఆటోమోబైల్ కంపెనీల విక్రయాలు భారీగా పెరిగాయి. మారుతీ సుజుకీ, హ్యూందాయ్, టాటా మోటర్స్ వంటి కంపెనీల విక్రయాల్లో గణనీయమైన వృద్ధి నమోదైంది.
- భారత్‌లోని అతిపెద్ద కార్ల తయారీ సంస్థ మారుతీ సుజుకీ దేశీయ విక్రయాలు 2020 మార్చిలో 70,976 ఉండగా, 2021 మార్చిలో అవి రెట్టింపై 1,49,518కు చేరుకున్నాయి.
- టాటా మోటార్స్‌ ప్రయాణికుల వాహన విక్రయాలు 2020 మార్చిలో కేవలం 5,676 ఉండగా, ఈ ఏడాది మార్చిలో అవి ఏకంగా 29,654 నమోదు చేశాయి.
- హ్యూందాయ్ మోటర్స్ ఇండియా 2020-21 మార్చిలో 52,600 వాహనాలు విక్రయించింది. అది గత ఏడాది మార్చిలో 26,300లు మాత్రమే ఉంది.
- టొయోటా కిర్లోస్కర్ మోటర్స్.. ఈ ఏడాది మార్చిలో 15,001 యూనిట్లు విక్రయించినట్లు ప్రకటించింది. 2013 నుంచి మార్చి నెల విక్రయాల్లో ఇదే అత్యధికమని తెలిపింది. 2020 మార్చిలో 7,023 యూనిట్లు అమ్మింది.
2019-20 ఆర్థిక సంవత్సరంలో కార్ల అమ్మకాలు 1,31,196 ఉండగా, 2020-21 ఆర్థిక సంవత్సరంలో అవి 2,22,25కు చేరుకున్నాయి. గత ఏడాది మార్చిలో మినీ కార్ల అమ్మకాలు 15,988 జరగగా, 2021 మార్చిలో అవి 24,653కు పెరిగాయి.
మొత్తం దేశీయ వాహనాలు 2019-20 ఆర్థిక సంవత్సరంలో 14,36,124 ఉండగా, కరోనా కారణంగా 2020-21 ఆర్థిక సంవత్సరంలో అవి 13,23,396కు పడిపోయినట్లు మోటారు వాహన విక్రయ సంఘం ఎంఎస్ఐ ఓ ప్రకటనలో తెలిపింది.
ద్విచక్రవాహనాల్లో..
ద్విచక్రవాహన విభాగంలో హీరో మోటోకార్ఫ్ దేశీయ మార్కెట్లో 5,44,340 యూనిట్లు విక్రయించినట్లు ప్రకటించింది. గత ఏడాది ఇదే సమయంలో 3,16,685 వాహనాలు మాత్రమే అమ్మినట్లు తెలిపింది.
టీవీఎస్ మోటర్స్ దేశీయ మార్కెట్లో గత మార్చిలో 2,02,155 వాహనాలు విక్రయించగా.. 2020, మార్చిలో 94,103గా ఉంది.
రాయల్ ఎన్ఫీల్డ్ ఈ ఏడాది మార్చిలో దేశీయ మార్కెట్లో 60,173 వాహనాలు విక్రయించగా.. గత ఏడాది అది 32,630గా ఉంది.
ఇదీ చూడండి: ఫాస్టాగ్పై ఐసీఐసీఐ బ్యాంక్, ఫోన్పే ఒప్పందం
