వైద్యం చేయించుకునేందుకు రుణం కావాలా?

ఆరోగ్య సమస్యలకు ఆస్పత్రి ఖర్చులు ప్రస్తుతం భారీ స్థాయిలో ఉంటున్నాయి. అలాంటి ఖర్చులు భరించాలంటే మధ్య తరగతి వారికి అదనపు భారంగా మారుతోంది. ఆరోగ్య బీమా ఉన్నా అవసరమైనంత మేర ఆదుకోలేని పరిస్థితి. అలాంటి సమయాల్లో సరిగ్గా ఉపయోగపడేదే మెడికల్​ లోన్. మెడికల్ లోన్ ఎలా పొందాలి? ఎవరికి ఈ లోన్ లభిస్తుంది? పూర్తి వివరాలు మీ కోసం.

అత్యవసర పరిస్థితుల్లో డబ్బు కావాల్సినప్పుడు రుణాలు ఇచ్చేందుకు చాలా బ్యాంకులు, బ్యాంకింగేతర ఆర్థిక సంస్థలు ముందుకొస్తున్నాయి. ఇప్పుడు ఈ కోవలోకి అంకుర సంస్థలు ప్రవేశించాయి. నిజానికి ఇవి వైద్య చికిత్సకోసం ఇచ్చే రుణాలే అయినప్పటికీ.. హామీ లేని వ్యక్తిగత రుణాల కిందికే వస్తాయి. వడ్డీ 12 శాతం మొదలుకుని రుణాన్ని, రుణ గ్రహీత వయస్సును బట్టి 30 శాతం వరకు ఉంటుంది.

ఈ రుణాలకు అర్హులు ఎవరంటే..

• మెడికల్ లోన్స్​ దరఖాస్తు చేసుకునేందుకు 23-58 ఏళ్ల వారిని అర్హులుగా పరిగణిస్తున్నాయి రుణసంస్థలు.
• రుణ గ్రహీతలకు నెలకు కనీసం రూ.20 వేల జీతం ఉండాలి.
• వడ్డీ రేటు మీరు తీసుకున్న రుణ మొత్తం, వ్యవధి, మీ వయసుపై ఆధారపడి ఉంటుంది.

ఎలాంటి ధ్రువపత్రాలు అవసరం..

మెడికల్ రుణాలు ఇచ్చే సంస్థలు చాలా వరకు ఆన్​లైన్​లోనే దరఖాస్తులను స్వీకరిస్తున్నాయి. అలాంటి అవకాశం లేకపోతే దరఖాస్తు పత్రాన్ని ప్రింట్ తీసుకుని అందులో మీ పూర్తి వివరాలు నింపాలి.

పాన్‌ కార్డు, పాస్‌పోర్టు, ఓటర్‌ గుర్తింపు కార్డు, డ్రైవింగ్‌ లైసెన్సులాంటివి మీ వ్యక్తిగత, చిరునామా గుర్తింపు కోసం అవసరం అవుతాయి.

ఆరునెలల లావాదేవీల వివరాలను (బ్యాంకు లావాదేవీలు) తెలపాలి. ఆన్‌లైన్‌లో వెంటనే ఈ వివరాలు తీసుకోవచ్చు. ఒకవేళ మీకు ఆన్‌లైన్‌ ఖాతా లేకుంటే మీ బ్యాంకు శాఖకు వెళ్లి, ఆరు నెలల లావాదేవీల వివరాలను తీసుకోవాలి.

ఆదాయ వివరాలను ధ్రువీకరించడానికి మీ ఫారం-16 ఉపయోగపడుతుంది. ఇది లేనప్పుడు మీ యాజమాన్యం ఇచ్చే ఆదాయ ధ్రువీకరణతోపాటు, గత ఆరు నెలల వేతన వివరాలు జత చేయాలి.

ఇప్పటికే ఉన్న రుణాలు దాచొద్దు

ఇంతకు ముందు చెప్పినట్లు ఇవి మెడికల్​ లోన్స్ అయినప్పటికీ.. వ్యక్తి గత రుణాలకు వర్తించే నిబంధనలే వీటికీ వర్తిస్తాయి. కాబట్టి రుణం మంజూరు చేసేముందు క్రెడిట్ స్కోరును పరిశీలిస్తారు.

ఇప్పటికే మీకు ఏవైనా వ్యక్తిగత రుణాలు, గృహ, కారు రుణాలు ఏమైనా ఉంటే వాటి వివరాలు ముందే వెల్లడించాలి. వీటిని దాచి రుణం పొందాలనుకుంటే రుణ దరఖాస్తు నిరాకరణకు గురికావచ్చు.

చిన్న వ్యాపారులు అర్హులే...

స్వయం ఉపాధి పొందుతున్న వారు, చిన్న వ్యాపారులు, వృత్తి నిర్వహిస్తున్నవారూ వైద్య రుణాలను పొందేందుకు అవకాశం ఉంది. ఇంచుమించుగా ఉద్యోగులకు వర్తించే నిబంధనలు, పత్రాలే వీరూ సమర్పించాలి.

వేతన ఖాతా వివరాలకు బదులు.. వారు వ్యాపారం నిర్వహిస్తున్న లైసెన్సులాంటివి చూపించాల్సి వస్తుంది. బ్యాలెన్స్‌ రిపోర్టు, ఆదాయ పన్ను రిటర్నులు, ఆడిట్‌ నివేదికలను చూపించవచ్చు.

ఇటీవలి కాలంలో ఆస్పత్రుల్లోనే నేరుగా చికిత్స రుణాలు అందిస్తామని ప్రకటనలు కనిపిస్తున్నాయి. ఆయా ఆస్పత్రుల్లో చికిత్సకోసం చేరిన తర్వాత మెడికల్ లోన్స్​కు దరఖాస్తు చేసుకునేందుకు వీలు కల్పిస్తున్నాయి. రుణానికి సరదు దరఖాస్తుదారులు అర్హులని భావిస్తే.. వీలైనంత త్వరగా రుణాలు మంజూరు చేస్తున్నాయి.

ఇదీ చూడండి: ఆశలు దాటి వడ్డీ కోత.. తగ్గిన జీడీపీ అంచనా