రష్యాకు చెందిన కరోనా వ్యాక్సిన్ 'స్పుత్నిక్-వి'కు భారత్ అత్యవసర వినియోగ అనుమతులు ఇవ్వడంపై రష్యా డైరెక్ట్ ఇన్వెస్ట్మెంట్ ఫండ్ (ఆర్డీఐఎఫ్) హర్షం వ్యక్తం చేసింది. స్పుత్నిక్-వి టీకాకు అనుమతినిచ్చిన 60వ దేశంగా భారత్ నిలిచినట్లు తెలిపింది.
24 గంటల్లోపే ఆమోదం..
దేశీయ ఫార్మా దిగ్గజం డాక్టర్ రెడ్డీస్తో కలిసి.. 'స్పుత్నిక్-వి' టీకాపై క్లినికల్ పరీక్షలు నిర్వహిస్తోంది ఆర్డీఐఎఫ్. ఈ నేపథ్యంలో ఇటీవలే అత్యవసర వినియోగ అనుమతులకు డాక్టర్ రెడ్డీస్ దరఖాస్తు చేసుకుంది. ఈ విషయంపై సోమవారం భేటీ అయిన నిపుణుల కమిటీ డీసీజీఐకు సిఫార్సు చేసింది. నిపుణుల కమిటీ సిఫార్సు చేసిన 24 గంటల్లోపే డీసీజీఐ 'స్పుత్నిక్-వి' టీకా అత్యవసర వినియోగానికి ఆమోద ముద్ర వేసింది.
ఏడాదికి 85 కోట్ల డోసుల ఉత్పత్తి..
స్పుత్నిక్-వి టీకా సామర్థ్యం 91.6 శాతంగా ఉన్నట్లు ప్రముఖ మెడికల్ జర్నల్ ది లాన్సెట్ జర్నల్ ప్రచురించిందని.. ఆర్డీఐఎఫ్ సీఈఓ కిరిల్ డిమిత్రివ్ పేర్కొన్నారు. డాక్టర్ రెడ్డీస్తో పాటు భారత్లో ఈ టీకాను.. హెటిరో, గ్లాండ్ ఫార్మా, స్టెలీస్ బయో ఫార్మా, పనాసియా బయోటెక్, విర్చోవ్ బయోటెక్ వంటి సంస్థలతో ఒప్పందం కుదుర్చుకున్నట్లు తెలిపారు. ఏడాదికి 85 కోట్లకుపైగా డోసులను ఉత్పత్తి చేయాలని లక్ష్యంగా పెట్టుకున్నట్లు వివరించారు.
ధర ఎంత?
'స్పుత్నిక్-వి' టీకా తీసుకోవడం ద్వారా ఎలాంటి అలర్జీలు రాకపోవడం సానుకూల విషయమని ఆర్డీఐఎఫ్ వర్గాలు తెలిపాయి. దీని ధర 10 డాలర్లలోపే (ఒక డోసుకు) ఉండొచ్చని పేర్కొన్నాయి.
ఇదీ చదవండి:రష్యా వ్యాక్సిన్ అత్యవసర వినియోగానికి డీసీజీఐ అనుమతి
