రహదారుల ప్రాజెక్టుల్లో చైనా కంపెనీలను అనుమతించబోమని కేంద్ర రవాణాశాఖ మంత్రి నితిన్ గడ్కరీ ప్రకటించారు. జాయింట్ వెంచర్లకు కూడా ఇది వర్తిస్తుందని స్పష్టం చేశారు. వీటితో పాటు ఎమ్ఎస్ఎమ్ఈల్లోనూ చైనా సంస్థల పెట్టుబడులను ప్రభుత్వం ప్రోత్సహించదని పేర్కొన్నారు.
చైనాతో సరిహద్దు వివాదం నెలకొన్న తరుణంలో గడ్కరీ వ్యాఖ్యలకు ప్రాధాన్యం ఏర్పడింది..
"రోడ్డు నిర్మాణాలకు సంబంధించి చైనా భాగస్వామిగా ఉండే జాయింట్ వెంచర్లకు అనుమతినివ్వము. ఈ విషయంపై మేము కఠినంగా వ్యవహరిస్తున్నాం. చైనా సంస్థల నిషేధానికి సంబంధించి త్వరలోనే విధివిధానాలను ప్రకటిస్తాం. దీనితో పాటు రహదారుల నిర్మాణంలో భారతీయ సంస్థలు భాగస్వాములుగా ఉండేందుకు కొన్ని నిబంధనలను సడలిస్తాం. సాంకేతిక, ఆర్థిక నిబంధనల్లో మార్పులు చేసేందుకు సమావేశం ఏర్పాటు చేయాలని.. ఇప్పటికే హైవే కార్యదర్శి గిరిధర్ అరామనే, ఎన్హెచ్ఏఐ ఛైర్మన్ ఎస్ ఎస్ సంధుకు ఆదేశాలిచ్చాను. నియమాల మార్పుతో భారత సంస్థలను ప్రోత్సహించినట్టు అవుతుంది."
--- నితిన్ గడ్కరీ, కేంద్ర రవాణాశాఖ మంత్రి.
అయితే తాజా నిర్ణయం... ప్రస్తుత, భవిష్యత్తు ప్రాజెక్టులకు వర్తిస్తుందని.. ఇప్పటికే మొదలైన వాటికి కాదని గడ్కరీ స్పష్టం చేశారు.
గత నెల 15న చైనీయులు భారత సైనికులపై దాడికి తెగబడ్డారు. 20మంది భారత జవాన్లను పొట్టనబెట్టుకున్నారు. అనంతరం చైనా తీరుపై దేశవ్యాప్తంగా నిరసనలు వ్యక్తమయ్యాయి. ఈ నేపథ్యంలో 59 చైనా యాప్స్ను సోమవారం నిషేధించింది ప్రభుత్వం. ఇప్పుడు రహదారులు, ఎమ్ఎస్ఎమ్ఈల్లో చైనా భాగస్వామ్యాన్ని తగ్గించనుంది.
