బలమైన పెట్టుబడులు, దేశీయ వినియోగం కారణంగా 2019-20 ఆర్థిక సంవత్సరంలో భారత వృద్ధి 7.1 శాతంగా నమోదవుతుందని ఐరాస అంచనా వేసింది. స్థూల దేశీయోత్పత్తి (జీడీపీ) వృద్ధిపై జనవరిలో విడుదల చేసిన నివేదికను తాజాగా సవరించింది ఐరాస.
జనవరిలో విడుదల చేసిన ప్రపంచ ఆర్థిక పరిస్థితులు, అంచనాలు (డబ్లూఈఎస్పీ)- 2019 నివేదికలో భారత వృద్ధి 2018-19లో 7.6 శాతంగా, 2019-20లో 7.4 శాతంగా ఉంటుందని అంచనా వేసింది ఐరాస. తాజా సవరణ నివేదికలో ఈ అంచనాలు వరుసగా 7.0 శాతం, 7.1 శాతంగా ఉంటాయని పేర్కొంది.
భారత వృద్ధి అంచనాలు తగ్గించినప్పటికీ ప్రపంచంలో వేగంగా వృద్ధి చెందుతున్న ఆర్థిక వ్యవస్థల్లో భారత్.. చైనా కన్నా ముందున్నట్లు పేర్కొంది.
3.0 శాతానికి మించని ప్రపంచ వృద్ధి
డబ్ల్యూఈఎస్పీ-2019 ప్రకారం 2018లో 3.0 శాతంగా ఉన్న ప్రపంచ వృద్ధి రేటు... 2018-19లో 2.7 శాతంగా, 2019-20లో 2.9 శాతంగా నమోదవుతుందని అంచనా వేసింది ఐరాస.
డబ్ల్యూఈఎస్పీ-2019 అర్ధ సంవత్సర నివేదికలో అన్ని ప్రధాన ఆర్థిక వ్యవస్థల అంచనాలను తగ్గించింది ఐరాస.
పరిశ్రమల ఉత్పత్తిలో తగ్గుదల, అంతర్జాతీయంగా వాణిజ్య బలహీనతలు సహా, అమెరికా-చైనా మధ్య నెలకొన్న వాణిజ్య యుద్ధ పరిణామాలు ప్రపంచ వృద్ధి అంచనాల తగ్గుదలకు కారణమని పేర్కొంది.
చైనాకు గడ్డుకాలమే
అమెరికా-చైనాల మధ్య వాణిజ్య యుద్ధం తార స్థాయికి చేరింది. ఈ కారణంగా 2017-18లో 6.6 శాతంగా ఉన్న చైనా ఆర్థిక వృద్ధి రేటు 2018-19లో 6.3 శాతానికి తగ్గే అవకాశం ఉంది. 2019-20లో మరింత క్షీణించి 6.2 శాతానికి తగ్గవచ్చని ఐరాస అంచనా వేసింది.
