ఇది తాగితే మీ బాడీ క్లీన్ అవుతుందట! మలినాలు పోయి ఫ్రెష్​గా ఉంటారట!

-శరీరంలోని మలినాలతో అనేక వ్యాధులకు ఛాన్స్ -ఆయుర్వేద పద్ధతిలో ఈ సమస్యకు చక్కటి పరిష్కారం

Body Detoxification in Ayurveda: మనం ఆరోగ్యంగా ఉండాలంటే శరీరంలో తయారయ్యే మలినాలు ఎప్పటికప్పుడూ బయటకు వెళ్లిపోవాలి. కానీ, కొన్ని సార్లు మలినాలు శరీరంలోనే పేరుకుపోవడం వల్ల అనేక అనారోగ్యాల బారిన పడుతుంటాం. అయితే, ఈ సమస్యకు ఆయర్వేదంలో చక్కని పరిష్కార మార్గం ఉందని నిపుణులు చెబుతున్నారు. ఈ పద్ధతిలో ఔషధాన్ని తయారు చేసుకుని తీసుకుంటే మంచి ఫలితాలు ఉంటాయని ఆయుర్వేద నిపుణులు డాక్టర్ గాయత్రీ దేవీ చెబుతున్నారు. ఈ నేపథ్యంలోనే దీనిని ఎలా తయారు చేసుకోవాలి? కావాల్సిన పదార్థాలు ఏంటో ఇప్పుడు తెలుసుకుందాం.

కావాల్సిన పదార్థాలు

• ఒక కప్పు బియ్యం నూకలు
• ఒక చెంచా త్రిఫల చూర్ణం
• ఒక చెంచా త్రికటుకాలు
• ఒక చెంచా వాము చూర్ణం
• ఒక చెంచా విడంగాల చూర్ణం

తయారీ విధానం

• ముందుగా స్టౌ ఆన్ చేసి ఓ గిన్నెలో బియ్యం నూకలను తీసుకుని దానికి 8 రెట్లు నీటిని పోసి వేడి చేసుకోవాలి.
• మరో గిన్నెలో త్రిఫల చూర్ణం, త్రికటుకాలు, వాము, విడంగాల చూర్ణం వేసి బాగా కలపాలి.
• ఆ తర్వాత ఈ మిశ్రమాన్ని మరుగుతున్న జావాలో వేసి నిమిషం పాటు ఉడికించుకోవాలి. అవసరమైతే రుచి కోసం సైంధవ లవణం కూడా కలుపుకోవచ్చు.
• అనంతరం స్టౌ ఆఫ్ చేసుకుని కాస్తే వేడి తగ్గిన తర్వాత గోరు వెచ్చగా తీసుకోవాలి.
• ఈ ఔషధాన్ని వారంలో ఒక్క రోజు తీసుకుంటే శరీరంలోని మలినాలు బయటకు వెళ్లిపోతాయని గాయత్రీ దేవీ చెబుతున్నారు.
• ఇంకా లివర్, కొలెస్ట్రాల్, షుగర్ లాంటి అనారోగ్య సమస్యలు ఉన్నవారు వారంలో రెండు సార్లు ఈ ఔషధాన్ని తీసుకోవాలని సూచిస్తున్నారు.

త్రిఫలాలు: కరక్కాయాలు, తానికాయలు, ఉసిరి కాయలను కలిపి త్రిఫలాలు అంటారు. ఇవి శరీరంలోని మలినాలను విరేచనాల ద్వారా బయటకు పంపడంలో సహాయ పడుతుందని చెబుతున్నారు. శరీరంలో మలినాలు అరగకుండా రక్త నాళాల్లో, కణజాలాల్లో ఉంటే వాటిని మలద్వారం గుండా బయటకు పంపిస్తాయని వివరిస్తున్నారు.

త్రికటుకాలు: శొంఠి, పిప్పళ్లు, మిరియాలను కలిపి త్రికటుకాలు అంటారు. వీటికి జీర్ణ శక్తిని మెరుగుపరిచే గుణం ఉంటుందని నిపుణులు చెబుతున్నారు. దీంతో పాటు మలినాలు బయటకు పంపించడంలోనూ ఉపయోగపడుతుందని అంటున్నారు.

వాము: జీర్ణ శక్తిని పెంచడంలో వాము చాలా బాగా ఉపయోగపడుతుందని నిపుణులు అంటున్నారు. దీంతో పాటు వాయు రూపంలో ఉన్న మలినాలను కూడా బయటకు పంపిస్తుందని చెబుతున్నారు.

విడంగాలు: విడంగాలు శరీరానికి మేలు చేసే టానిక్​లాగా ఉపయోగపడుతుందని చెబుతున్నారు. ముఖ్యంగా శరీరంలోని నులి పురుగుల లాంటి సూక్ష్మ జీవులు ఉంటే వాటిని బయటకు తీసుకువస్తాయని వివరిస్తున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.