పండగ సీజన్ ఆఫర్లతో అమెజాన్, ఫ్లిప్కార్ట్ వంటి ఈ -కామర్స్ సంస్థలు అమ్మకాలకు వినియోగదారుల నుంచి భారీ స్పందన వచ్చింది. గ్రేట్ ఇండియన్ ఫెస్టివల్ సేల్, బిగ్ బిలియన్ డేస్ అంటూ ఈ కంపెనీలు ప్రకటించిన ఆఫర్లతో మొదటి నాలుగు రోజుల్లో 22 వేల కోట్ల అమ్మకాలు జరిగినట్లు తాజా గణాంకాలు స్పష్టం చేశాయి.
అక్టోబర్ 22 వరకు ఈ పండగ అమ్మకాలు కొనసాగుతున్న నేపథ్యంలో ఈ అమ్మకాల విలువ 4.7 బిలియన్ డాలర్లకు చేరుకోవచ్చునని ట్రేడ్ వర్గాలు అంచనా వేస్తున్నాయి.
సెకనుకు 110 ఆర్డర్లు..
ఫ్లిప్కార్ట్- బిగ్ బిలియన్ డేస్లో సెకను 110 ఆర్డర్లు నమోదైనట్లు ఆ సంస్థ ప్రకటించింది. ఈ సమయంలో 66కోట్ల మంది వెబ్సైట్ను సందర్శించినట్లు తెలిపింది. వీటిలో 52 శాతం చిన్న పట్టణాల్లోనే నమోదైనట్లు వెల్లడించింది. ఇప్పటికే కోటి షిప్మెంట్లు పూర్తయినట్లు స్పష్టం చేసింది. ఇప్పటివరకూ జరిగిన సేల్లో సగానికి పైగా ఉత్పత్తులు వర్క్ ఫ్రం హోం విభాగంలోనివేనని పేర్కొంది.
రెండు రోజుల్లోనే..
అమెజాన్- గ్రేట్ ఇండియన్ ఫెస్టివల్ సేల్ మొదలైన 48 గంటల్లో లక్షా పదివేల ఆర్డర్లు వచ్చినట్లు సంస్థ ప్రతినిధి తెలిపారు. ఇందులో 66 శాతం ఆర్డర్లు చిన్నచిన్న పట్టణాల నుంచి వచ్చినవేనని వెల్లడించారు.
గతేడాది ఇదే తరహా వార్షిక అమ్మకాల్లో ఈ-కామర్స్ సంస్థలు 20 వేల కోట్ల అమ్మకాలు చేపట్టాయి. ఈ సారి కరోనా వల్ల ఈ ఆన్లైన్ అమ్మకాలు మరింత పెరిగినట్లు నిపుణులు భావిస్తున్నారు.
ఇదీ చూడండి: ఈ-కామర్స్ ముసుగులో చైనీయుల బెట్టింగ్ యాప్లు
