ఫేస్బుక్కు చెందిన ప్రముఖ సంక్షిప్త సందేశాల సంస్థ వాట్సాప్.. అనేకమంది జీవితాల్లో ఓ భాగమైంది. దీనికి తగ్గట్టుగానే వినియోగదారులను ఆకర్షించేందుకు వాట్సాప్ ఎప్పటికప్పుడు సరికొత్త ఫీచర్లను తెస్తోంది. ఇటీవలి కాలంలో వెనువెంటనే కొత్త ఫీచర్లను తీసుకువచ్చింది. మరికొన్ని అప్డేట్లు త్వరలో రానున్నాయి. ఇవన్ని మొబైల్ యాప్లలో ఉన్నాయి. అయితే మొబైల్ ఫోన్లలోనే కాకుండా.. మీ పనిలో భాగంగా వాట్సాప్ను వినియోగిస్తే.. మీకు వాట్సాప్ వెబ్ గురించి తెలిసే ఉంటుంది. మీరు వాడే కంప్యూటర్లో సులభంగా వాట్సాప్ను వినియోగించేందుకు తీసుకువచ్చిన సదుపాయమే ఈ వాట్సాప్ వెబ్. ఫోన్తో పని లేకుండా కంప్యూటర్ ద్వారానే వాట్సాప్లో అన్ని రకాల పనులు చేయొచ్చు. అయితే వాట్సాప్ వెబ్లో ఎన్నో ఫీచర్లు దాగి ఉన్నాయి. అవెంటి.. వాటిని ఎలా వినియోగించుకోవాలి అనే వివరాలు మీకోసం.
ఈమోజీలు వేగంగా..
ప్రస్తుతం.. ప్రతి సందేశానికి ఈమోజీతో రిప్లై ఇవ్వడం తప్పని సరిగా మారింది అనేది అందరు అంగీకరించే విషయమే. ప్రతి విషయాన్ని మరింత బలంగా చెప్పేందుకు ఈ ఈమోజీలు ఎంతగానో ఉపయోగపడుతున్నాయి. మొబైల్ ఫోన్లలో వీటిని పంపడం సులభంగానే ఉన్నా.. వాట్సాప్ వెబ్లో వాటిని మౌస్తో ఎంచుకుని పంపాల్సి వస్తుంది. ఇది కాస్త.. ఇబ్బందిగా అనిపిస్తుంది. అయితే ఈ సమస్యను సులభంగా పరిష్కరించవచ్చు. మీకు కావాల్సిన ఈమోజి కోసం ":" (కోలన్)ను టైప్ చేయాలి. ఆ తర్వాత మీకు అవసరమైన ఈమోజి పదాన్ని టైప్ చేస్తే.. ఆ ఈమోజీలు మాత్రమే కనిపిస్తాయి. వాటిని సలభంగా ఎంపిక చేసుకుని పంపించొచ్చు.
మల్టిపుల్ వాట్సాప్లు..
మొబైల్ ఫోన్లలో ఒకే సారి ఒకే నంబర్పై రెండు వాట్సాప్లు కుదరదు. అయితే వాట్సాప్ వెబ్లో అది పెద్ద సమస్యకాదు. వెబ్లో ఒకేసారి రెండు కన్నా ఎక్కువ వాట్సాప్లు వినియోగించుకోవచ్చని చాలా మందికి తెలియదు. ఒక కంప్యూటర్లో మల్టిపుల్ వాట్సాప్లు వాడాలంటే.. ఇన్కాగ్నిటో ట్యాబ్, వేరే బ్రౌజర్లలో వాట్సాప్ వెబ్ను వినియోగించి వాడుకోవచ్చు.
అవతలి వారికి తెలియకుండా మెసేజ్లు చదవచ్చు..
మీరు ఏ మెసేజ్ చదివినా అవతలి వారికి సులభంగా తెలిసిపోతుంది. అలా తెలియకుండా ఉండాలంటే వాట్సాప్ వెబ్లో ఓ ట్రిక్ ఉంది. ఇందుకోసం ముందుగా మీ వాట్సాప్ వెబ్ ఉన్న విండోను ఓపేన్ చేసి.. అది కనబడేలా మరో విండోను ఓపేన్ చేయాలి. తర్వాత ఓపెన్ చేసిన విండోపైన మాత్రమే కర్సర్ను ఉంచాలి దీని ద్వారా అవతలి వ్యక్తికి.. మీరు మెసేజ్ చదివినట్లు తెలియదు.
