ప్రధానంగా దక్షిణాది రాష్ట్రాల్లో విస్తరించిన సీఎస్బీ బ్యాంక్ (గతంలో కేథలిక్‌ సిరియన్‌ బ్యాంకు) ఈ ఆర్థిక సంవత్సరంలో 20- 25 శాతం వృద్ధి సాధించాలని (CSB bank future plans) లక్ష్యంగా పెట్టుకుంది. కేరళలోని త్రిసూర్‌ కేంద్రంగా 8 దశాబ్దాలుగా కార్యకలాపాలు సాగిస్తున్న ఈ బ్యాంకు ఇటీవల ఆంధ్రప్రదేశ్, తెలంగాణలతో పాటు ఉత్తరాదిలోని రాజస్థాన్‌, మధ్యప్రదేశ్‌, గుజరాత్‌ రాష్ట్రాల్లో కొత్త శాఖలను (CSB bank Expansion) అధికంగా ఏర్పాటు చేస్తోంది. కొవిడ్‌ తగ్గినందున రిటైల్‌ రుణాలకు (Retail loans) గిరాకీ పెరుగుతోందని, ఇందుకు తగ్గట్లుగా విస్తరణ ప్రణాళికలతో ముందుకు సాగుతున్నామని సీఎస్బీ బ్యాంకు ఎండీ అండ్‌ సీఈఓ సివిఆర్ రాజేంద్రన్ 'ఈనాడు' ఇంటర్వ్యూలో వెల్లడించారు. ఆయన గతంలో ఆంధ్రా బ్యాంకు సీఎండీగా, అసోసియేషన్‌ ఆఫ్‌ మ్యూచువల్‌ ఫండ్స్‌ ఆఫ్‌ ఇండియా (యాంఫీ) సీఈఓగా పనిచేశారు.
ముఖ్యాంశాలివీ..
జూన్‌ త్రైమాసికంలో సీఎస్బీ బ్యాంకు ఆకర్షణీయ ఫలితాలు ఎలా సాధ్యమయ్యాయి
డిపాజిట్లలో 14 శాతం, రుణాల్లో 24 శాతం వృద్ధి నమోదు చేశాం. కరెంటు, సేవింగ్‌ ఖాతాల డిపాజిట్లను అధికంగా ఆకర్షించగలిగాం. బంగారం తనఖా రుణాలు బాగా పెరిగాయి. వ్యవసాయం, సూక్ష్మ రుణాలు అధికంగా జారీ చేశాం. ప్రణాళికాబద్ధంగా ముందుకు సాగడమే ఇందుకు కారణం.
రుణాల్లో అధిక వృద్ధికి మీ ముందున్న మార్గాలేమిటి? రిటైల్‌ రుణాల మీదే ఆధారపడతారా
మాది చిన్న బ్యాంకు. అందువల్ల రిటైల్‌ రుణాల వైపే మా మొగ్గు ఉంటుంది. మా మొత్తం రుణాల్లో బంగారం తనఖా రుణాలు 38 శాతం ఉన్నాయి. వ్యవసాయ, ద్విచక్ర వాహన, ఎంఎస్‌ఎంఈ రుణాలు సైతం అధికంగా ఇస్తున్నాం. మంచి ఖాతాలు లభిస్తే.. కార్పొరేట్‌ రుణాలు ఇచ్చేందుకు సిద్ధంగానే ఉన్నాం. కాకపోతే ఆయా ఖాతాలపై మాకు పూర్తి అవగాహన ఉండాలి.
నిరర్థక ఆస్తుల సమస్య ఎలా ఉంది
జూన్‌ త్రైమాసికంలో బంగారం రుణ ఖాతాల నుంచి మొండి బాకీలు అధికంగా ఉన్నాయి. కరోనా పరిణామాలే ఇందుకు కారణమైనందున, హామీగా పెట్టిన బంగారాన్ని వేలం వేయడం లేదు. రుణగ్రస్తులకు కొంత సమయం ఇచ్చి చూస్తాం. మిగతా విభాగాల్లోనూ రానిబాకీలు ఉంటున్నాయి. ఇందుకు తగిన కేటాయింపులు చేస్తున్నాం. ముందుముందు ఈ సమస్య కొంత తగ్గుతుంది.
మీరు నిర్దేశించుకున్న వ్యాపార లక్ష్యాలు, విస్తరణ ప్రణాళికలు ఏమిటి
కనీసం 25 శాతం వార్షిక వృద్ధి సాధించాలనేది మా ప్రధాన లక్ష్యం. నికర వడ్డీ మిగులు 4.5 శాతం ఉండేలా చూడాలనుకుంటున్నాం. గత ఆర్థిక సంవత్సరంలో నెలకొల్పిన 101 కొత్త శాఖలతో కలిపి బ్యాంకుకు 521 శాఖలు ఉన్నట్లు అవుతోంది. ఈ ఆర్థిక సంవత్సరంలో 200 కొత్త శాఖలు, 200 కొత్త ఏటీఎం కేంద్రాలు నెలకొల్పుతాం. ఏదైనా ఇతర బ్యాంకును సొంతం చేసుకునే అవకాశం వస్తే.. దాన్ని అందిపుచ్చుకోడానికి సిద్ధంగా ఉన్నాం.
దేశవ్యాప్త బ్యాంకు కావాలనే ఆలోచన ఉందా
గత ఏడాది ప్రారంభించిన 101 కొత్త శాఖల్లో 92 శాఖలను ఆంధ్ర, తెలంగాణతో పాటు ఉత్తరాది రాష్ట్రాల్లో ఏర్పాటు చేశాం. గుజరాత్‌, రాజస్థాన్‌, మధ్యప్రదేశ్‌, చత్తీస్‌గఢ్‌ రాష్ట్రాల్లో కొత్త శాఖలను అధికంగా నెలకొల్పుతున్నాం.
బ్యాంకింగ్‌ అంతా డిజిటల్‌ పద్ధతికి మారిపోతోంది. మీ బ్యాంకు ఏ విధంగా స్పందిస్తోంది
మేం అన్ని రకాల సేవలను డిజిటల్‌ పద్ధతిలో అందిస్తున్నాం. ఏటీఎం, మొబైల్‌/ ఇంటర్నెట్‌ బ్యాంకింగ్‌, పీఓఎస్‌, యూపీఐ, ఇ-పాస్‌ బుక్‌, వాట్సాప్‌ బ్యాంకింగ్‌.. ఇలా అన్ని రకాలైన సేవలు ఉన్నాయి. మైక్రో ఏటీఎంలను బాగా విస్తరిస్తాం. ఇతర సంస్థలతో భాగస్వామ్యాలు కుదుర్చుకుని ప్రీ-పెయిడ్‌ కార్డు, క్రెడిట్‌ కార్డు జారీ చేసే యత్నాలు చేపట్టాం. మరిన్ని డిజిటల్‌ సేవల కోసం నూతన సీటీఓ (చీఫ్‌ టెక్నాలజీ ఆఫీసర్‌) ను నియమించాం.
బ్యాంకులకు సమీప భవిష్యత్తులో ఎటువంటి సవాళ్లు ఎదురు కావచ్చు
డిపాజిట్ల వృద్ధికి సమస్య లేదు. కానీ రుణాల జారీలో అప్రమత్తం కావాలి. వ్యవస్థలో నగదు లభ్యత అధికంగా ఉంది. కాస్త మంచి రేటింగ్‌ కల వినియోగదార్లు 7- 8 శాతం వడ్డీరేటుకు అప్పు కావాలని అడుగుతున్నారు. రెండేళ్ల క్రితం అయితే ఇటువంటి పరిస్థితిని ఊహించడానికే అవకాశం లేదు. ఈ పరిస్థితుల్లో బ్యాంకులు అప్రమత్తంగా ఉండాలి. సరైన పరిశీలన లేకుండా అప్పులు ఇచ్చి తిప్పలు తెచ్చుకోకూడదు.
ఏపీ, తెలంగాణ రాష్ట్రాల్లో మీ కార్యకలాపాలు ఏ స్థాయిలో ఉన్నాయి
ఈ రెండు రాష్ట్రాల్లో సీఎస్బీ బ్యాంకు శాఖల సంఖ్య 9 నుంచి 39 కి పెరిగింది. ఇక్కడ మొత్తం వ్యాపారం రూ.1065 కోట్లకు పెరిగింది. ఈ ఏడాదిలో ఇంకా కొత్త శాఖలు ఏర్పాటు చేస్తాం కనుక మరింత వ్యాపారాన్ని నమోదు చేస్తాం.
ఇదీ చదవండి: ఆదాయం లేకున్నా.. ఐటీఆర్ ఫైలింగ్ తప్పనిసరి!
