ప్రముఖ లగ్జరీ కార్ల తయారీ సంస్థ మెర్సిడెజ్ బెంజ్.. సరికొత్త ఆవిష్కరణ చేసింది. భవిష్యత్తు అవసరాలను దృష్టిలో పెట్టుకుని ఆకర్షణీయ హంగులతో కొత్త కారును రూపొందించింది. ఈ కారుకు ఏవీటీఆర్ అనే నామకరణం చేసింది మెర్సిడెజ్.
అమెరికా లాస్వెగాస్లో జరుగుతున్న కన్స్యూమర్ ఎలక్ట్రానిక్ షో-2020లో ఈ ఆవిష్కరణకు అధిక మార్కులు పడ్డాయి. ఇదే వేదికగా సంస్థ విడుదల చేసిన ప్రచార వీడియో.. ప్రేక్షకులను చూపుతిప్పుకోకుండా చేసింది.
కేమరూన్ సాయంతో..
హాలీవుడ్ దర్శక దిగ్గజం జేమ్స్ కేమరూన్ 'అవతార్' చిత్రం థీమ్తో.. ఆయన సాయంతో ఈ కారు రూపుదిద్దుకుందని బెంజ్ సంస్థ తెలిపింది. సినిమాల్లోనే కనిపించే గ్రాఫిక్స్ నిజజీవితంలో సాధ్యమయ్యేలా ఈ కారును రూపొందించింది. ఇందులో ఆర్గానిక్ ఘటాలతో తయారు చేసిన రీసైకిల్ బ్యాటరీలను అమర్చుతామని పేర్కొంది.
సోనీ నుంచి మొదటిసారి..
ఎలక్ట్రానిక్ దిగ్గజం సోనీ.. కార్ల వ్యాపారంలో అడుగుపెట్టేందుకు సీఈఎస్ను వేదికగా చేసుకుంది. అయితే సంప్రదాయ కార్ల తయారీ కాకుండా సరికొత్త ఎలక్ట్రిక్ కాన్సెప్ట్తో ఈ కారును సొంత సాంకేతికతతో రూపొందించింది సోనీ.
'విజన్-ఎస్' పేరుతో త్వరలో మార్కెట్లోకి రానున్న ఈ కారు రవాణా వ్యవస్థలో సరికొత్త విప్లవాన్ని తీసుకొస్తుందని సంస్థ విశ్వాసం వ్యక్తం చేసింది. ఈ కారు... ప్రయాణ సమయంలో పరిసరాలను సెన్సార్ల ద్వారా స్కాన్ చేసి సూచనలు ఇస్తుంది. ట్రాఫిక్తో పాటు ఎదురుగా వస్తున్న వాహనాల గురించి హెచ్చరికలు చేస్తుంది.
"ఇందులో వినోద అంశాలు జోడించాం. మేము అందిస్తున్న 360 రియాలిటీ ఆడియోతో సంగీతం వినటంలో కొత్త అనుభూతి కలుగుతుంది. ఈ కారు మనుషుల ఆలోచనలను ముందుగానే పసిగడుతుంది. పెద్ద తెరల ద్వారా వినోదంతో పాటు డ్రైవింగ్ సమాచారం ఎప్పటికప్పుడు అందిస్తుంది."
-కెనిచిరో యోషిదా, సీఈఓ, సోనీ
