జెట్ఎయిర్వేస్ సంక్షోభంపై స్పందించింది 'ఆల్ ఇండియా బ్యాంకు ఎంప్లాయిస్ అసోషియేషన్'. 22 వేల మంది ఉద్యోగుల భవిష్యత్తును రక్షించే దిశగా ప్రభుత్వం నిర్ణయం తీసుకోవాలంటూ ప్రధానమంత్రి నరేంద్రమోదీకి లేఖ రాసింది.
ఎయిర్లైన్స్కు రుణం ఇవ్వాలని బ్యాంకులపై ఒత్తిడి తేవొద్దని కోరింది. బిడ్డింగ్లో ఎవరైనా జెట్ ఎయిర్వేస్ను సొంతం చేసుకోవడానికి వస్తే సరి... లేదంటే ప్రభుత్వమే అధీనం చేసుకోవాలని కోరింది.
"రుణదాతలే జెట్ ఎయిర్వేస్ యజమానులు అయినప్పటికీ... ఈ సంక్షోభం నుంచి ఎయిర్లైన్స్ను రక్షించాలని ప్రతి ఒక్కరూ బ్యాంకులవైపు చూస్తున్నారు. జెట్ఎయిర్వేస్కు నరేష్గోయెల్ ఇప్పటికీ ప్రమోటర్గానే ఉన్నారు. అంతేకాదు సంస్థలో అత్యధికంగా 51 శాతం షేర్లు ఆయనకే ఉన్నాయి. ఈ పరిస్థితిలో జెట్ ఎయిర్వేస్ను కొనసాగిస్తారో... లేక వేరే ఎవరికైనా అమ్ముకుంటారో అది ఆయనకు సంబంధించిన విషయం.
ఈ సంక్షోభానికి ప్రధాన కారకుడైన గోయెల్ను రక్షించడానికే... బ్యాంకులు మరింత రుణసహకారమందించాలంటూ ఒత్తిడి తెస్తున్నారు. అందరికీ సమాధానమివ్వాల్సిన గోయెల్ను పక్కనబెట్టి మొత్తం తతంగాన్ని పక్కదారి పట్టించాలని చూస్తున్నారు."
- ఆల్ ఇండియా బ్యాంక్ ఎంప్లాయిస్ అసోసియేషన్
అప్పులు రూ.13 వేల కోట్లకు పైనే
జెట్ ఎయిర్వేస్ సంస్థ... బ్యాంకులకు రూ.8,500 కోట్లు, రుణదాతలకు రూ. 4000 కోట్లు, ఉద్యోగుల జీతాలు ఇలా అన్నీ కలుపుకుంటే మొత్తం రూ.13 వేల కోట్లకు పైగా అప్పుల్లో కూరుకుపోయింది.
ఆఫర్లు పరిశీలిస్తున్న రుణదాతలు
ఈ సంక్షోభం నుంచి బయటపడే మార్గాలకోసం రుణదాతలు తీవ్ర ప్రయత్నాలు చేస్తున్నట్లు బ్యాంకింగ్ వర్గాల సమాచారం. అలాగే విమానాశ్రయ స్లాట్స్తో పాటు తమ ఆస్తులను కాపాడుకునేందుకు సంబంధిత అధికారులను సంప్రదిస్తున్నట్లు తెలిపాయి.
బిడ్డింగ్ ప్రక్రియ పూర్తయ్యే వరకు 15 జెట్ విమానాలను ఇతర ఎయిర్లైన్స్కు లీజు ఇవ్వాలనుకుంటున్నారు రుణదాతలు. ఇందుకోసం ఎయిర్ ఇండియాతో పాటు మరిన్ని ఎయిర్లైన్స్ ఇచ్చిన ఆఫర్లను పరిశీలిస్తున్నారు. దీని ద్వారా ఆర్థికంగా కొంతమేర ఉపశమనం పొందాలని వారు ఆలోచిస్తున్నారు.
బుధవారం నుంచే తాత్కాలిక నిలిపివేత
25 ఏళ్లపాటు నిరవధిక సేవలందించింది జెట్ ఎయిర్వేస్. కార్యకలాపాలను తాత్కాలికంగా నిలిపివేస్తున్నట్లు ఆ సంస్థ బుధవారం ప్రకటించింది. అత్యవసరంగా అవసరమైన రూ. 400 కోట్ల నిధులు ఇచ్చేందుకు రుణదాతలు అంగీకరించకపోవడమే ఇందుకు కారణంగా తెలిపింది.
