'అమెజాన్​లో లక్షకుపైగా తాత్కాలిక ఉద్యోగ అవకాశాలు'

దేశంలో త్వరలో పండుగ సీజన్ ప్రారంభం కానుంది. ఈ నేపథ్యంలో ఈ కామర్స్ దిగ్గజాలు భారీ ఆఫర్లు ఇచ్చేందుకు సిద్ధమవుతున్నాయి. ఈ సమయంలో భారీగా వచ్చే ఆర్డర్లను.. వేగంగా వినియోగదారులకు డెలివరీ చేసేందుకు లక్షకుపైగా తాత్కాలిక ఉద్యోగాలు సృష్టించినట్లు బుధవారం ప్రకటించింది.

పండుగ సీజన్​ నేపథ్యంలో దేశంలో లక్షకు పైగా తాత్కాలిక ఉద్యోగ అవకాశాలను సృష్టించినట్లు ఈ కామర్స్ దిగ్గజం అమెజాన్ ఇండియా బుధవారం ప్రకటించింది. అమెజాన్, ఫ్లిప్​కార్ట్ వంటి దిగ్గజాలు.. పండుగల సమయాల్లో వచ్చే భారీ ఆర్డర్లను సమర్థంగా నిర్వహించేందుకు వేల సంఖ్యలో తాత్కాలిక ఉద్యోగులను నియమించుకోవడం సాధారణంగా జరుగుతుంటోంది.

కొత్త ఉద్యోగాలతో వినియోగదారులకు వేగంగా డెలివరీ అందడం సహా.. పండుగ సీజన్​లో కంపెనీ డెలివరీ సామర్థ్యం కూడా పెరుగుతుందని అమెజాన్ పేర్కొంది.

ట్రాకింగ్ భాగస్వాములు, ప్యాకేజింగ్, 'ఐ హ్యావ్ స్పేస్' డెలవరీ పార్టనర్స్, అమెజాన్ ఫ్లెక్స్ భాగస్వాములు, హౌస్​కీపింగ్ ఏజెన్సీల్లో కూడా పరోక్షంగా వేల సంఖ్యలో ఉద్యోగాలు సృష్టించినట్లు అమెజాన్ పేర్కొంది. ఈ ఏడాది మేలో కూడా అమెజాన్​ 70 వేల సీజనల్ ఉద్యోగ అవకాశాలు సృష్టించడం గమనార్హం.

2019లోనూ.. అమెజాన్, ఫ్లిప్​కార్ట్​లు పండుగ సీజన్​లో సప్లై సామర్థ్యం, గ్రామ స్థాయికి డెలివరీ అందించే ఉద్దేశంతో 1.4 లక్షల తాత్కాలిక ఉద్యోగాలు సృష్టించినట్లు ప్రకటించడం గమనార్హం.

కరోనా నేపథ్యంలో ఉపాధి లేమి సమస్యలు ఎదుర్కొంటున్న ప్రస్తుత పరిస్థితుల్లో.. ఈ ఉద్యోగ అవకాశాలు చాలా ఉపయోగపడుతాయని పేర్కొంది అమెజాన్.

ఇదీ చూడండి:దేశంలో 5, 4 స్టార్ ఏసీల వినియోగం 14శాతమే!