ఆర్థికంగా కుదేలయిన జెట్ ఎయిర్వేస్కు చేయూతనిచ్చేందుకు ఎయిర్ ఇండియా ప్రయత్నిస్తోంది. జెట్కు చెందిన ఐదు బోయింగ్ 777 విమానాలను లీజుకు తీసుకునే దిశగా ఆలోచిస్తున్నట్టు ఎస్బీఐ ఛైర్మన్ రజనీష్ కుమార్కు ఎయిర్ ఇండియా ఛైర్మన్ అశ్వని లోహని లేఖ రాశారు.
అన్ని రకాల విమాన సర్వీసులను జెట్ సంస్థ నిలిపివేసింది. జెట్ శ్రేణిలో భారీ విమానాలు చాలానే ఉన్నాయి. ఇందులో బోయింగ్ 777-300 ఈఆర్, ఎయిర్బస్ ఏ330 ఉన్నాయి. ఈ విమానాలను జెట్ సంస్థ ఉపయోగించిన సర్వీసుల ప్రకారమే లండన్, దుబాయి, సింగపూర్కు వాడనున్నట్టు తెలుస్తోంది.
ప్రయాణికులకు ఊరట
జెట్లో ముందస్తు బుకింగ్ చేసుకున్న ప్రయాణికులకు తీపి కబురును అందించింది ఎయిర్ ఇండియా. జెట్ సర్వీసుల రద్దు కారణంగా ముందుగా బుకింగ్ చేసుకున్న ప్రయాణికులు ఇబ్బందులు ఏర్పడ్డాయి. వీరిలో అంతర్జాతీయ ప్రయాణికులకు ప్రత్యేక ధరలను అందుబాటులోకి తెస్తామని ఎయిర్ఇండియా ప్రకటించింది.
ఇతర సంస్థలకు సర్వీసులు
జెట్ విమానాల రద్దుతో ప్రయాణికుల ఇబ్బందులు తగ్గించేందుకు భారత పౌర విమానయాన సంస్థ ప్రయత్నాలు చేస్తోంది. దిల్లీ, ముంబయి విమానాశ్రయాల్లో 440 సర్వీసులను ఇతర సంస్థలకు అప్పగించనుంది.
ధరలు పెంచొద్దు
వేసవిలో విమానరంగానికి డిమాండ్ సర్వసాధారణం. జెట్ సర్వీసుల రద్దు నేపథ్యంలో ప్రయాణికుల రద్దీ పెరిగే అవకాశం ఉంది. అయితే ధరలు పెరగకుండా చూడాలని విమానయాన సంస్థలను ప్రభుత్వం కోరింది. డిమాండ్ పెరిగినా ధరలు అదుపు తప్పొద్దని ఆదేశాలు జారీ చేసింది.
ఇదీ చూడండి: జెట్ ఎయిర్వేస్ పాక్షిక మూసివేత
