సంక్షోభంలో చిక్కుకున్న ఎస్ బ్యాంకు రేపటి నుంచి యథావిధిగా తన కార్యకలాపాలను కొనసాగించనుంది. ఈ నేపథ్యంలో లిక్విడిటీకి (డబ్బులకు) ఎలాంటి సమస్యలు ఉండవని స్పష్టం చేశారు బ్యాంకు నూతన సీఈగా నియమితులైన ప్రశాంత్ కుమార్.
భారీ అప్పుల్లో కూరుకుపోయిన ఎస్ బ్యంకుపై ఈ నెల 5న ఆర్బీఐ మారటోరియం విధించింది. వినియోగదారులు రూ.50,000 వరకు మాత్రమే నగదు ఉపసంహరణకు అనుంతించింది. బ్యాంకును సంక్షోభం నుంచి బయటకు లాగేందుకు కేంద్రం ఉద్దీపనలు ప్రకటించగా.. రేపు (మార్చి 18) సాయంత్రం 6 గంటలకు మారటోరియం ఎత్తివేయనుంది ఆర్బీఐ.
"మేం తగినన్ని చర్యలు తీసుకున్నాం. మా ఏటీఎంలు అన్నింటిలో నగదు కొరత ఉండదు. బ్యాంకు శాఖల్లోనూ సరిపడ డబ్బు ఉంటుంది. కాబట్టి నగదుకు సంబంధించి ఎస్ బ్యాంకు వైపు నుంచి కచ్చితంగా ఎలాంటి సమస్యలు లేవు." - ప్రశాంత్ కుమార్
బ్యాంకు వినియోగదారులెవ్వరూ తమ డిపాజిట్లపై ఆందోళన చెందాల్సిన పని లేదని భరోసా ఇచ్చారు. బ్యాంకుపై మారటోరియం ఎత్తివేసిన అనంతరం మునుపటిలానే బ్యాంకు సేవలు అన్ని తిరిగి కొనసాగుతాయని స్పష్టం చేశారు.
ఇదీ చూడండి:మే 31 వరకు బీఎస్-4 వాహనాల విక్రయం?
