కరోనా వల్ల మహిళా ఉద్యోగుల విషయంలో అసమానతలు పెరిగినట్లు ఓ సర్వే వెల్లడించింది. తమ ఎదుగుదల, పదోన్నతులు కరోనా వల్ల పెరిగిన లింగ వివక్షతో ప్రభావితమైనట్లు సర్వేలో పాల్గొన్న 85 శాతం మంది మహిళలు తెలిపారు. 'లింక్డ్ఇన్ ఆపర్చునిటీ ఇండెక్స్ 2021' పేరుతో విడుదలైన సర్వేలో ఈ విషయాలు వెల్లడయ్యాయి.
సర్వేలోని మరిన్ని వివరాలు..
- కుటుంబ బాధ్యతల వల్ల 69 శాతం మంది పని చేసే తల్లులు వివక్షను ఎదుర్కొంటున్నారు.
- కరోనా వల్ల తమపై ప్రతికూల ప్రభావం పడినట్లు 89 శాతం మంది మహిళలు అభిప్రాయం వ్యక్తం చేశారు.
- 66 శాతం మంది మాత్రం తమ ముందు తరంతో పోలిస్తే.. లింగ సమానత్వం మెరుగైందని తెలిపారు. అయితే ఆసియా పసిఫిక్ ప్రాంతంలో మాత్రం పని చేసే మహిళల్లో అత్యధిక లింగ వివక్ష భారత్లోనే ఉందని సర్వే పేర్కొంది.
- తాము పని చేసే కంపెనీలు పురుషులకు సానుకూలంగా వ్యవహరించడం.. తమ భవిష్యత్ పురోగతి విషయంలో అసంతృప్తికి కారణమని 22 శాతం మంది పని చేసే మహిళలు పేర్కొన్నారు.
- తమకు తక్కువ అవకాశాలు ఉంటాయనే విషయాన్ని 25 శాతం మంది పురుషులు మాత్రమే అంగీకరిస్తున్నట్లు 37 శాతం మంది మహిళలు చెప్పారు.
- ఉద్యోగ భద్రత, ఇష్టమైన పని, వృత్తి, వ్యక్తిగత జీవిత సమతుల్యత.. ఈ మూడూ భారత్లో ఉద్యోగం విషయంలో మహిళలు, పురుషులు కోరుకునే ముఖ్యమైన అంశాలు.
- ఇరువురికి ఇలాంటి లక్ష్యాలే ఉన్నా.. జెండర్ ముఖ్యమని ఎక్కువ మంది మహిళలు (63 శాతం) భావిస్తున్నారు.
- ప్రతి ఇద్దరిలో ఒకరి కంటే ఎక్కువ మంది వృత్తిపరమైన సంబంధాలు పెరగాలని, తమ భవిష్యత్కు ఉపయోగపడే మెంటర్ అవసరమని భావిస్తున్నారు. సరైన ప్రోత్సాహం, గైడెన్స్ లేకపోవడం అవకాశాలకు ప్రధాన అడ్డంకిగా మారుతున్నాయని అనుకుంటున్నారు.
ఇదీ చదవండి:ముకేశ్, మస్క్ పోటాపోటీ.. సంపదలో కాదు!
