ఎస్ బ్యాంకు వ్యవస్థాపకుడు రాణా కపూర్, తదితరులపై మనీలాండరింగ్ కేసులో దర్యాప్తునకు సంబంధించి.. రిలయన్స్ గ్రూప్ ఛైర్మన్ అనిల్ అంబానీకి ఈడీ సమన్లు జారీ చేసినట్లు అధికారులు తెలిపారు. సంక్షోభంలో కూరుకుపోయిన ఎస్ బ్యాంకు నుంచి అంబానీ గ్రూపు కంపెనీలు సుమారు రూ. 12,800 కోట్ల రుణాలు తీసుకున్నట్లు పేర్కొన్నారు.
అయితే కొన్ని వ్యక్తిగత కారణాల వల్ల ప్రస్తుతం రావడం కుదరదని.. హాజరు తేదీని మార్చాలని అంబానీ ఈడీని కోరినట్లు అధికారులు తెలిపారు.
అన్ని కార్పొరేట్ కంపెనీలకు సమన్లు
ఎస్ బ్యాంకుతో ముడిపడిన కంపెనీలల్లో అనిల్ అంబానీ గ్రూప్, ఎస్సెల్, ఐఎల్ఎఫ్ఎస్, డీహెచ్ఎఫ్ఎల్, వొడాఫోన్ ఉన్నట్లు ఇటీవల కేంద్ర ఆర్థిక మంత్రి నిర్మలా సీతారామన్ తెలిపారు. ఎస్ బ్యాంకు నుంచి పెద్దమొత్తంలో రుణాలు తీసుకున్న అన్ని కార్పొరేట్ కంపెనీలకు చెందిన వ్యవస్థాపకులకు.. దర్యాప్తులో భాగంగా సమన్లు పంపించనున్నట్లు అధికారులు వివరించారు.
