ప్రపంచ బ్యాంకు 13వ అధ్యక్షుడిగా 63 ఏళ్ల డేవిడ్ మల్పాస్ను బ్యాంకు కార్యనిర్వహణ బోర్డు ఏకగ్రీవంగా ఎన్నుకుంది. ఈ నెల 9వ తేదీన ఆయన బాధ్యతలు చేపట్టనున్నారు. ఐదు సంవత్సరాల పాటు ఈ పదవిలో ఉండనున్నారు. డేవిడ్ ప్రస్తుతం అమెరికా ప్రభుత్వ అంతర్జాతీయ వ్యవహారాల ట్రెజరీ విభాగంలో సీనియర్ అధికారిగా ఉన్నారు. ప్రపంచ బ్యాంకు క్రితం అధ్యక్షులంతా అమెరికాకు చెందిన వారే.
జీ7, జీ20 ఆర్థిక మంత్రుల సదస్సు, ప్రపంచ బ్యాంకు వార్షిక సమావేశాలతో పాటు ఇతర ముఖ్యమైన కార్యక్రమాలకు గతంలో డేవిడ్ అమెరికా తరపున ప్రాతినిధ్యం వహించారు.
సంస్కరణల్లో కీలక పాత్ర...
అమెరికా ప్రభుత్వంలో అధికారి కాక ముందే ఆర్థికవేత్తగా ఉన్నారు డేవిడ్ మల్పాస్. ఈయన న్యూయార్క్లో స్థూల ఆర్థికశాస్త్ర పరిశోధన కేంద్రాన్ని స్థాపించారు.
అమెరికా ప్రభుత్వ అధికారిగా ఉన్న ఆయన... ప్రపంచ బ్యాంకుకు సంబంధించి ముఖ్యమైన సంస్కరణల్లో కీలక పాత్ర వహించారు. అందులో అంతర్జాతీయ పునర్నిర్మాణ అభివృద్ధి బ్యాంకు(ఐబీఆర్డీ), అంతర్జాతీయ అభివృద్ధి సంఘం(ఐడీఏ)లకు మూలధనం పెంపు లాంటివి ఉన్నాయి.
