ప్రస్తుత బిజీ ప్రపంచంలో ప్రయాణాలు సవాళ్లతో కూడుకున్నవి. ముఖ్యంగా పట్టణాల్లో ట్రాఫిక్ సమస్య మరీ ఘోరం. వీటి నుంచి తప్పించుకునేందుకు ఎంతో మంది ఉపయోగించే ముఖ్య సాధనం గూగుల్ మ్యాప్స్. ఎక్కడెక్కడ ట్రాఫిక్ ఉందో.. ఏ మార్గంలో సాఫీగా సాగిపోవచ్చో ఇందులో చూసి చాలా మంది ప్రయాణాలకు సిద్ధమవుతారు.
అయితే.. అలాంటి గూగుల్ మ్యాప్స్నే తన నైపుణ్యంతో బోల్తా కొట్టించాడో ఘనుడు.
ట్రాఫిక్ను వేర్వేరు రంగుల్లో ప్రదర్శించే గూగుల్ మ్యాప్స్.. తీవ్రతను బట్టి ఎరుపు, నారింజ రంగులను చూపిస్తుంది. ఓ నిర్దిష్ట ప్రాంతంలోని గూగుల్ మ్యాప్స్ వినియోగదారులను పరిగణనలోకి తీసుకొని ట్రాఫిక్ను నిర్ధరిస్తుంది గూగుల్. అయితే.. సైమన్ వెకర్ట్ అనే ఓ వ్యక్తి ఆ గూగుల్ మ్యాప్స్ను బురిడీ కొట్టిస్తూ.. వర్చువల్ ట్రాఫిక్ జామ్ను సృష్టించాడు. ఫలితంగా.. ఖాళీ రోడ్డునే రద్దీగా చూపిస్తూ వాహనాలు నెమ్మదిగా కదులుతున్నట్లు కనిపించింది. ఇది చూసి ఆశ్చర్యపోవడం గూగుల్ వంతైంది.
ఇలా చేశాడు..
ఈ హ్యాకింగ్ కోసం.. వెకర్ట్ 99 స్మార్ట్ఫోన్లను వాడాడు. వాటన్నింటినీ.. ఓ తోపుడు బండిలో వేసి ఖాళీ వీధిలో నెమ్మదిగా నడిచాడు. ఈ కారణంగా.. ఖాళీ రోడ్డును గూగుల్ మ్యాప్స్ రద్దీగా ఉన్నట్లు చూపించింది.
- " class="align-text-top noRightClick twitterSection" data="">
''గూగుల్ మ్యాప్స్లో వర్చువల్ ట్రాఫిక్ జామ్ను సృష్టించేందుకు.. 99 స్మార్ట్ఫోన్లను ఓ తోపుడుబండిలో వేశాను. ఇలా చేయడం ద్వారా.. గ్రీన్ స్ట్రీట్స్ను(రద్దీ లేని) ఎరుపుగా (రద్దీ) మార్చవచ్చు. అయితే.. ఇది రోజువారీ జీవనంపై ఎంతో ప్రభావం చూపుతుంది. ఈ మార్గంలో వెళ్లాల్సిన కార్లను వేరే మార్గానికి తరలించి.. అక్కడ ట్రాఫిక్లో చిక్కుకుపోయేలా చేయొచ్చు.''
- వీడియోలో సైమన్ వెకర్ట్
గూగుల్ మ్యాప్స్లోని లోపాల్ని అదనుగా తీసుకొని.. తన తెలివితో బోల్తా కొట్టించాడు సైమన్. అయితే.. ఇలాంటి హ్యాకింగ్స్ ఇతరులూ పాటిస్తే ఎందరో డ్రైవర్ల విలువైన సమయం వృథా అవుతుంది. గూగుల్ మ్యాప్స్ ఆధారంగానే కార్యకలాపాలు సాగించే క్యాబ్స్.. ఎక్కువగా ప్రభావితం అవుతాయి.
గూగుల్ మ్యాప్స్ను సైమన్ ఎలా మోసం చేశాడో ఈ వీడియోలో స్పష్టంగా చూడొచ్చు. బెర్లిన్లోని గూగుల్ కార్యాలయం బయటనే ఇలా చేయడం గమనార్హం. అయితే.. ఇలాంటి సంఘటనలు మళ్లీ జరగకుండా సాఫ్ట్వేర్ దిగ్గజ సంస్థలు నియంత్రించాలని గూగుల్ వినియోగదారులు కోరుతున్నారు.
