స్టాక్మార్కెట్లు వరుసగా రెండో రోజు లాభాలతో ముగిశాయి. విదేశీ పెట్టుబడుల ప్రవాహం, రూపాయి బలోపేతం, అమెరికా-చైనా వాణిజ్య చర్చలు సత్ఫలితాలు ఇస్తాయన్న అంచనాలు ఇందుకు కారణమయ్యాయి.
బొంబాయి స్టాక్ ఎక్స్చేంజి సూచీ-సెన్సెక్స్ 127.19 పాయింట్లు లాభపడి 38,675 పాయింట్ల వద్ద స్థిరపడింది. జాతీయ స్టాక్ ఎక్స్చేంజి సూచీ-నిఫ్టీ 53.90 పాయింట్ల లాభంతో నిర్ణయాత్మక 11,600 పాయింట్ల స్థాయిని తాకింది. సెషన్ ముగిసే సమయానికి 11,623.90 వద్ద స్థిరపడింది.
ఇదీ కారణం
అంతర్జాతీయ మార్కెట్ల నుంచి వచ్చిన సానుకూల పవనాలకు తోడు దేశీయ పెట్టుబడులు నేటి లాభాలకు ప్రధాన కారణం. వాహన, చమురు రంగ షేర్ల కొనుగోళ్లపై మదుపరులు ఆసక్తి చూపారు.
నిన్నటి భారీ లాభాలకు కారణమైన ఆర్థిక రంగ షేర్లు మాత్రం నేడు లాభాల స్వీకరణతో డీలా పడ్డాయి.
ఇంట్రాడే సాగిందిలా..
| సూచీ | గరిష్ఠం | కనిష్ఠం |
| సెన్సెక్స్ | 38,748.54 | 38,546.68 |
| నిఫ్టీ | 11,630.35 | 11,570.15 |
లాభానష్టాల్లోనివివే...
సెన్సెక్స్లో నేడు వేదాంత అత్యధికంగా 3.20 శాతం లాభపడింది.ఈ వరుసలో టాటా స్టీల్ 2.73 శాతం, ఎం అండ్ ఎం 2.27 శాతం, టాటా మోటార్స్ 2.17 శాతం, ఓఎన్జీసీ 1.66 శాతం, హెచ్యూఎల్ 1.40 శాతం లాభాలను నమోదు చేశాయి.
ఇండస్ఇండ్ బ్యాంకు 2.08 శాతం, ఐటీసీ 1.10 శాతం, బజాజ్ ఆటో 0.89 శాతం, యాక్సిస్ బ్యాంకు 0.79 శాతం, ఎన్టీపీసీ 0.37 శాతం, ఐసీఐసీఐ బ్యాంకు 0.29 శాతం నష్టపోయాయి.
30 షేర్ల ఇండెక్స్లో 19 షేర్లు లాభాలను నమోదు చేయగా... 11 షేర్లు నష్టాల్లో ముగిశాయి. 50 షేర్ల నిఫ్టీ ప్యాక్లో 33 షేర్లు లాభాలను, 17 షేర్లు నష్టాలను నమోదు చేశాయి.
ఇవాళ రూపాయి 13 పైసలు బలపడి డాలర్తో మారకం విలువ 69.17కు చేరింది.
లాభాల వారం..
ఈ వారంలో సెన్సెక్స్ 508 పాయింట్లు పెరిగింది. నిఫ్టీ 167 పాయింట్లు లాభపడింది.
