వరుసగా ఏడు సెషన్లలో లాభాలు పొందిన స్టాక్ మార్కెట్లు ఎనిమిదో సెషన్ను మిశ్రమ ఫలితాలతో ముగించాయి. రూపాయి పతనం, ఆసియా మార్కెట్ల నష్టాల ప్రభావంతో సూచీలకు ఊగిసలాట తప్పలేదు. ఫెడ్ రిజర్వ్ విధాన నిర్ణయం వెలువడనున్న నేపథ్యంలో, అమెరికా- చైనా మధ్య వాణిజ్య చర్చలు విఫలం కావచ్చనే ఊహాగానాలతో అనేక మంది పెట్టుబడిదారులు కొనుగోళ్లు జరపకుండా జాగ్రత్త వహించారు.
23 పాయింట్ల వృద్ధితో 38,386 వద్ద సెన్సెక్స్ ముగియగా, నిఫ్టీ 11పాయింట్ల నష్టంతో 11,521 వద్ద ముగిసింది.
ఇంతకుముందు ఏడు సెషన్లలో సూచీలు 1500 పాయింట్లు పైగా లాభపడ్డాయి.
గురువారం హోలీ సందర్భంగా మార్కెట్లకు సెలవు.
కుప్పకూలిన "జెట్" షేర్లు:
అప్పుల ఊబిలో కూరుకుపోయి, విమానాల లీజు చెల్లించలేని స్థితికి చేరుకున్న జెట్ ఎయిర్ వేస్ సంస్థ షేర్లు మార్కెట్లో పేకమేడల్లా కూలిపోయాయి. ట్రేడింగ్లో ఆ సంస్థ షేర్లు 7 శాతం మేర పతనమయ్యాయి.
ఆర్కామ్ షేర్ల జోరు:
అనిల్ అంబానికి చెందిన ఆర్కామ్ సంస్థ షేర్లు సత్తా చాటాయి. ట్రేడింగ్లో 10 శాతం వృద్ధి సాధించాయి.
లాభాలు గడించినవి ఇవే:
ఇన్ఫోసిస్, హెచ్డీఎఫ్సీ, ఎల్ అండ్ టీ.
రూపాయి పతనం....ఐటీ జోరు:
రూపాయి పతనంతో ఐటీ షేర్లు లాభాల బాట పట్టాయి. సాఫ్ట్వేర్ ఎగుమతులకు చెల్లింపులు డాలర్ రూపంలో జరుగుతాయి. అందుకే రూపాయి పతనం ఐటీ రంగానికి కలిసొచ్చే అంశం.
