కరోనా వ్యాక్సిన్ కోసం ప్రపంచమంతా వెయ్యి కళ్లతో ఎదురుచూస్తోంది. పలు సంస్థలు మూడో దశ క్లినికల్ ట్రయల్స్ను ఇప్పటికే ప్రారంభించాయి. ఈ నేపథ్యంలో 2021నాటికి 10 కోట్ల వ్యాక్సిన్ డోసులను భారత్ సహా పేద, మధ్య ఆదాయ దేశాల కోసం సిద్ధం చేస్తామని చెప్పారు పుణెకు చెందిన సీరం ఇనిస్టిట్యూట్ ఆఫ్ ఇండియా సీఈఓ అదర్ పూనావాలా. గావి, బిల్ అండ్ మెలిండా ఫౌండేషన్ సహకారంతో వ్యాక్సిన్ ప్రాజెక్టు పనులకు వేగవంతం చేసినట్లు ట్విట్టర్ వేదికగా వెల్లడించారు.
వ్యాక్సిన్ ధర రూ.225(3 డాలర్లు)కు మించదని స్పష్టం చేశారు పూనావాలా. మొత్తం 92 దేశాలకు అందుబాటులో ఉండేలా చేస్తామన్నారు.
వ్యాక్సిన్ అభివృద్ధి ప్రాజెక్టులో భాగంగా బిల్ అండ్ మెలిండా ఫౌండేషన్ 150 మిలియన్ డాలర్లను గావికి సమకూర్చుతుంది. వ్యాక్సిన్ను ఉత్పత్తి చేసేందుకు ఈ నిధులను సీరం సంస్థకు ఇవ్వనుంది గావి.
అమెరికన్ వ్యాక్సిన్ సంస్థ నోవావాక్స్.. తన కొవిడ్ వ్యాక్సిన్ అభివృద్ధి వాణిజ్యీకరణ కోసం సీరం సంస్థతో సరఫరా, లైసెన్స్ ఒప్పందం కుదర్చుకున్నట్లు ప్రకటించిన మరునాడే 10 కోట్ల వ్యాక్సిన్ డోసుల విషయాన్ని వెల్లడించారు పూనావాలా.
సీరం సంస్థ ప్రపంచంలోనే అతిపెద్ద వ్యాక్సిన్ తయారీదారు. కొవిడ్ వ్యాక్సిన్ ఉత్పత్తి కోసం ఆక్స్ఫర్డ్ యూనివర్సిటీ, ఆస్ట్రాజెనికాలతో కలిసి పనిచేస్తోంది. వ్యాక్సిన్ 2, 3వ దశ ప్రయోగాల కోసం సీరం సంస్థకు డీసీజీఐ ఇప్పటికే అనుమతిచ్చింది.
ఇదీ చూడండి: 'నవ భారత్ నిర్మాణానికి కొత్త విద్యా విధానమే పునాది'
