స్టాక్ మార్కెట్లు నష్టాల్లో కొనసాగుతున్నాయి. మూడు రోజులుగా సమావేశమైన ఆర్బీఐ ద్రవ్య పరపతి విధాన కమిటీ నేడు నిర్ణయాలను ప్రకటించనుంది. ఈ నేపథ్యంలో మదుపరులు జాగ్రత్తగా వ్యవహరిస్తున్నారు. మార్కెట్లు ప్రతికూలంగా కొనసాగుతున్నాయి.
బొంబాయి స్టాక్ ఎక్స్చేంజీ సూచీ - సెన్సెక్స్ 104 పాయింట్లు కోల్పోయింది. 39 వేల 978 వద్ద ట్రేడవుతోంది. జాతీయ స్టాక్ ఎక్స్చేంజీ సూచీ- నిఫ్టీ 45 పాయింట్లు క్షీణించి 11 వేల 976 వద్ద కొనసాగుతోంది. ఆరంభ ట్రేడింగ్లో మార్కెట్లు ఫ్లాట్గా మొదలై... అనంతరం నష్టాల్లోకి వెళ్లాయి.
లాభనష్టాల్లోనివివే...
పవర్ గ్రిడ్ కార్పొరేషన్, ఐఓసీ, బజాజ్ ఆటో, డాక్టర్ రెడ్డీస్ ల్యాబ్స్ల షేర్లు లాభాల జాబితాలో ఉన్నాయి.
గెయిల్, ఇండియా బుల్స్ హెచ్ఎస్జీ, యెస్ బ్యాంక్, ఎస్బీఐ, వేదాంత, ఐసీఐసీఐ, హెచ్డీఎఫ్సీ, జీ ఎంటర్టైన్మెంట్, ఇండస్ ఇండ్ బ్యాంకుల షేర్లు నష్టాల్లో ట్రేడవుతున్నాయి.
ఆర్బీఐ గవర్నర్ శక్తికాంతదాస్ అధ్యక్షతన ఆర్థిక విధాన కమిటీ (ఎంపీసీ) సమావేశం నేటితో ముగుస్తుంది. అనంతరం నూతన విధానాలను ప్రకటించనుంది ఆర్బీఐ.
గత రెండు విధాన సమీక్ష సమావేశాల్లో రెపోరేట్ను 25 బేసిస్ పాయింట్లు తగ్గించింది ఆర్బీఐ. ఈసారీ రెపోరేట్ను తగ్గించే అవకాశం ఉందని నిపుణులు అంచనా వేస్తున్నారు.
అంతర్జాతీయంగా మిశ్రమ ఫలితాలు
ఆరంభ ట్రేడింగ్లో ఆసియాకు చెందిన చైనా, జపాన్, కొరియా మార్కెట్లు మిశ్రమ ఫలితాలతో ప్రారంభమయ్యాయి.
రూపాయి పతనం...
రూపాయి 13 పైసలు క్షీణించింది. డాలర్తో పోలిస్తే రూపాయి మారకం విలువ 69.39 వద్ద ట్రేడవుతోంది.
