కరోనా మహమ్మారి రెండో దశ ప్రభావం కంపెనీలు, గిగ్(తాత్కాలిక) ఉద్యోగులపై అధికంగా పడినట్లు ఓ అధ్యయనం స్పష్టం చేసింది. ముఖ్యంగా రిటైల్, హాస్పిటాలిటీ, ఏవియేషన్, నిర్మాణ రంగంలో ఉన్న తాత్కాలిక కార్మికులపై కొవిడ్ రెండో దశ ప్రభావం ఎక్కువగా ఉన్నట్లు తెలిపింది.
ఈ ఏడాది ప్రారంభంలో భారత ఆర్థిక వ్యవస్థ తిరిగి పుంజుకోవడం మొదలుపెట్టిందని వివరించారు అధ్యయనకర్తలు. ఈ క్రమంలోనే డిసెంబర్ త్రైమాసికంతో పోల్చితే... జనవరి-మార్చిలో ఉద్యోగ అవకాశాల సంఖ్య 32 శాతం మేర పెరిగినట్లు ప్రపంచ ఉద్యోగ నియామకాల సంస్థ మైఖేల్ పేజ్ తెలిపింది. కరోనా రెండో దశలో పెరుగుతున్న కేసుల దృష్ట్యా ఆయా రాష్ట్రాల్లో లాక్డౌన్ అమలు చేయడం కారణంగా.. దేశ ఆర్థిక వ్యవస్థ క్షీణిస్తోందని తెలిపింది. అయితే ఇది గతేడాదితో పోల్చితే అంత ప్రభావం చూపదని అభిప్రాయపడింది.
స్థానిక లాక్డౌన్ను విధించడం వల్ల వలస కార్మికులు వారి సొంతూర్లకు తిరిగి రావడం వల్ల దాని ప్రభావం కంపెనీలు, గిగ్(తాత్కాలిక) ఉద్యోగులపై పడినట్లు మైఖేల్ పేజ్ ఇండియా ఎండీ నికోలస్ డుమౌలిన్ తెలిపారు.
ఇదీ చూడండి: ఏప్రిల్లో తగ్గిన ఉద్యోగ నియామకాలు!
