ప్రభుత్వ రంగ బ్యాంకింగ్ దిగ్గజం భారతీయ స్టేట్ బ్యాంక్ (ఎస్బీఐ) ఖాతాదారులకు శుభవార్త తెలిపింది. పొదుపు ఖాతాలకు(సేవింగ్స్ అకౌంట్) కనీస నిల్వ నిబంధనను తొలగిస్తున్నట్లు ప్రకటించింది. వినియోగదారులందరికీ ఊరటనిచ్చేలా ఎస్ఎంఎస్ ఛార్జీలనూ రద్దు చేసింది.
ప్రస్తుత నిబంధన ఇలా..
నెలవారీగా ఎస్బీఐ ఖాతాల్లో రూ.3,000 (మెట్రో నగరాల్లో), రూ.2,000 (సెమీ అర్బన్), రూ.1,000 (గ్రామీణ ప్రాంతాల్లో) కనీస నిల్వ నిబంధన అమలులో ఉంది. ఖాతాదారులు కనీస నిల్వను నిర్వహించకపోతే రూ.5 నుంచి రూ.15 వరకు అపరాధ రుసుము కింద వసూలు చేస్తోంది.
వడ్డీ రేటు తగ్గింపు..
పొదుపు ఖాతాలకు వార్షిక వడ్డీ రేటును 3 శాతానికి హేతుబద్దీకరించింది. ప్రస్తుతం రూ.లక్ష వరకు డిపాజిట్లపై 3.25 శాతం వడ్డీ, రూ.లక్షకు పైగా డిపాజిట్లపై 3 శాతం వడ్డీని చెల్లిస్తోంది ఎస్బీఐ. తాజా నిర్ణయంతో 44.51 కోట్ల పొదుపు ఖాతాదారులపై ప్రభావం పడనుంది.
