ఎస్ బ్యాంక్ పునరుద్ధరణ ప్రయత్నాలు మరింత ముమ్మరం చేసింది భారతీయ రిజర్వు బ్యాంకు (ఆర్బీఐ). ఇందులో భాగంగా ఆర్బీఐ మాజీ డిప్యూటీ గవర్నర్ ఆర్ గాంధీ, ఎస్పీ జైన్ ఇన్స్టీట్యూట్ ఆఫ్ మేనేజ్మెంట్ అండ్ రీసెర్చ్ ప్రొఫెసర్ అనంత్ నారాయణన్ను అదనపు బోర్డు డైరెక్టర్లుగా నియమిస్తూ నిర్ణయం తీసుకుంది.
వీరి నియామకం మార్చి 26 నుంచి రెండేళ్ల వరకు అమలులో ఉండనున్నట్లు ఆర్బీఐ తెలిపింది. మార్చి 14 నుంచి అమలులోకి వచ్చిన ఎస్ బ్యాంక్ పునరుద్ధరణ పథకం ప్రకారం ఇంకా ఓ అదనపు డైరెక్టర్ను నియమించేందుకు ఆర్బీఐకి అధికారాలున్నాయి.
సంక్షోభంతో మారతున్న ఎస్ బ్యాంక్ స్వరూపం
ఎస్ బ్యాంక్ భారీ రుణ ఊబిలో చిక్కుకున్న కారణంగా బ్యాంకుపై మార్చి 5న మారటోరియం విధించింది ఆర్బీఐ. ఆ తర్వాత బ్యాంకు బోర్డును రద్దు చేసి ఆ స్థానంలో కొత్త బోర్డును నియమిస్తోంది. ఇందులో భాగంగా మార్చి 18 నుంచి మారటోరియం ఎత్తివేసి బ్యాంకు సీఈఓ, ఎండీ బాధ్యతలు ప్రశాంత్ కుమార్కు అప్పగించిస్తున్నట్లు ప్రకటించింది. ఆయన కూడా మార్చి 26న బాధ్యతలు స్వీకరించనున్నారు.
ఎస్ బ్యాంక్ కొత్త బోర్డును నాన్ ఎగ్జిక్యూటివ్ ఛైర్మన్ పదవిలో సునీల్ మెహతా, నాన్ ఎగ్జిక్యూటివ్ డైరెక్టర్ హోదాలో మహేశ్ కృష్ణమూర్తి, అతుల్ భేడా నేతృత్వం వహించనున్నారు.
ఇదీ చూడండి: కరోనా సోకుతుందన్న ఆందోళనలో 'రానా'!
