కేంద్ర, రాష్ట్ర ప్రభుత్వాల పెన్షనర్లకు 'ఇండియా పోస్ట్' గుడ్ న్యూస్ చెప్పింది. పెన్షనర్లు, సీనియర్ సిటిజన్లు తమ సమీపంలోని పోస్టాఫీసుల ద్వారా జీవన్ ప్రమాణ్ సేవలు పొందొచ్చని వెల్లడించింది. ముఖ్యంగా లైఫ్ సర్టిఫికెట్ను సమీపంలోని పోస్టాఫీసుల ద్వారా సులభంగా పొందొచ్చని తెలిపింది.
టెక్నాలజీ గురించి పెద్దగా అవగాహన లేని వృద్ధులకు ఇది ఎంతో ఊరటనిచ్చే అంశమనే చెప్పాలి. ఇప్పటి వరకు లైఫ్ సర్టిఫికెట్ పొందేందుకు పెన్షన్ ఖాతా ఉన్న బ్యాంకులకు, కొన్ని ప్రత్యేక సందర్భాల్లో అయితే తాము పని చేసిన సంస్థ కార్యాలయానికి వెళ్లి లైఫ్ సర్టిఫికెట్ పొందాల్సి వచ్చేది.
ఇప్పుడు ఇండియా పోస్ట్ లైఫ్ సర్టిఫికెట్ అందించే సేవలు ప్రారంభించడం వల్ల 60 లక్షల కేంద్ర ప్రభుత్వ పెన్షనర్లకు ప్రయోజనం కలగనుంది. భారీ సంఖ్యలో రాష్ట్ర, కేంద్ర పాలిత ప్రాంత పెన్షనర్లకు ఊరట లభించనుంది.
ఏమిటీ లైఫ్ సర్టిపికెట్..?
పెన్షన్దారుడు జీవించి ఉన్నారని తెలిపేందుకు ఉద్దేశించినదే ఈ లైఫ్ సర్టిఫికెట్. ఇది బయోమెట్రిక్తో కూడిన ఆధార్ ఆధారిత డిజిటల్ లైఫ్ సర్టిఫికేట్. ఆధార్, బయోమెట్రిక్ను ఉపయోగించి దీనిని పొందవచ్చు.
కేంద్ర, రాష్ట్ర, ప్రభుత్వ సంస్థల ఉద్యోగులు ఉద్యోగ విరమణ అయిన అనంతరం పెన్షన్ పొందేందుకు ఖాతా ఉన్న బ్యాంకులు, పోస్టాఫీసుల్లో ఈ జీవన ప్రమాణ పత్రాన్ని తప్పకుండా సమర్పించాల్సి ఉంటుంది.
ఏ వివరాలు అవసరం?
ఆధార్ సంఖ్య, పేరు, మొబైల్ నంబరు, ఫించను సంబంధిత సమాచారంపై సెల్ఫ్ డిక్లరేషన్ (పీపీఓ నంబర్ తరహా), పెన్షన్ ఖాతా నంబరు, బ్యాంక్ ఖాతా సమాచారం, పెన్షన్ మంజూరు సంస్థ పేరు, పింఛను పంపిణీ చేసే సంస్థ తదితర వివరాలు అవసరం అవుతాయి. అంతేకాకుండా బయోమెట్రిక్స్(వేలిముద్ర లేదా ఐరిస్) అందించాల్సి ఉంటుంది.
వ్యాలిడిటీ ఎన్ని రోజులు?
జీవన ప్రమాణ పత్రం తీసుకున్న సమయంలో పెన్షన్ ముంజూరు చేసే సంస్థ నియమనిబంధనలపై వ్యాలిడిటీ ఆధారపడి ఉంటుంది. సాధారణంగా జీవన ప్రమాణ పత్రం వ్యాలిడిటీ సంవత్సరం ఉంటుంది. వ్యాలిడిటీ అయిపోయిన అనంతరం మరో జీవన ప్రమాణ పత్రం పొందాల్సి ఉంటుంది.
ఇవీ చదవండి:
