శిక్షణా కేంద్రాల్లో విద్యార్థులు ఫీజులపై 18 శాతం జీఎస్టీ చెల్లించాల్సిందేనని అథారిటీ ఫర్ అడ్వాన్స్ రూలింగ్(ఏఏఆర్) ఆంధ్రప్రదేశ్ ధర్మాసనం తీర్పునిచ్చింది. కోర్సు ఫీజులు, వసతి, మెస్ ఛార్జీలకు సంబంధించి ఎలాంటి మినహాయింపులకు అర్హులు కారని స్పష్టం చేసింది.
గుంటూర్కు చెందిన మాస్టర్ మైండ్స్ అనే శిక్షణ సంస్థ దాఖలు చేసిన పిటిషన్పై విచారించిన ధర్మాసనం ఈ మేరకు తీర్పునిచ్చింది. ఇటువంటి శిక్షణా సంస్థలకు సంబంధించిన విద్యా సేవలకు పన్ను మినహాయింపు ఉండవని తెలిపింది.
"సీఏ, ఐసీఏఐ, ఐసీడబ్ల్యూఏఐ వంటి కోర్సుల్లో ధ్రువపత్రాల కోసం శిక్షణా కేంద్రాల్లో చదవటం తప్పనిసరి కాదు. పరీక్షలను సులభతరంగా ఎదుర్కొనేందుకు ఏర్పాటు చేసుకున్నవే ఈ కోచింగ్ సెంటర్లు. వీటిల్లో శిక్షణ పొందినంత మాత్రాన చట్ట ప్రకారం అర్హత, ధ్రువపత్రాలు మంజూరు చేయలేరు."
- ఏఏఆర్ ధర్మాసనం
గుర్తింపు ఇవ్వలేం..
అంతేకాకుండా ఇలాంటి సంస్థల్లో ఏకరూప విధానం ఉండదని, భిన్న రకాల కోర్సులతో వివిధ రకాల ఫీజులు వసూలు చేస్తారని వ్యాఖ్యానించింది ధర్మాసనం. అందువల్ల ఇటువంటి కోచింగ్ కేంద్రాలకు విద్యాసంస్థలుగా గుర్తింపు ఇవ్వలేమని స్పష్టం చేసింది.
ఈ సందర్భంగా గతంలో తీర్పులను ప్రస్తావించింది ఏఏఆర్. 2018లో మహారాష్ట్ర ఏఏఆర్ ధర్మాసనం ప్రైవేటు కోచింగ్ కేంద్రాల ఫీజులపై మినహాయింపు ఇచ్చేందుకు నిరాకరించిందని గుర్తు చేసింది.
వీటికే మినహాయింపులు..
ప్రస్తుత పన్ను విధానం ప్రకారం ప్రధాన విద్యా సేవలకు మినహాయింపులు ఇచ్చింది. ప్రీ- స్కూల్ నుంచి ఉన్నత మాధ్యమిక విద్య, చట్టం ద్వారా అర్హత పొందిన కోర్సులు, వృత్తివిద్యా కోర్సులకు ఈ మినహాయింపులు వర్తిస్తాయి. మిగతా విద్యా సేవలతో సహా మెస్, మరమ్మతులు, నిర్వహణకు 18 శాతం పన్ను కట్టాల్సి ఉంటుంది.
లక్షల్లో ఫీజులు..
గతేడాది ప్రముఖ శిక్షణా కేంద్రాల ప్రతినిధులు 18 శాతం జీఎస్టీని తొలగించాలని డిమాండ్ చేశారు. లేదా కనీసం అతితక్కువ స్లాబ్ అయినా కేటాయించాలని కోరారు. దీని వల్ల లక్షల్లో ఫీజులు చెల్లిస్తోన్న చాలా మంది విద్యార్థులు, వారి తల్లిదండ్రులకు ఊరట కలుగుతుందని తెలిపారు.
దేశవ్యాప్తంగా గేట్, నీట్, జేఈఈ, సివిల్ సర్వీసెస్ వంటి పోటీ పరీక్షలకు సుమారు 50 లక్షల మంది హాజరవుతారని అంచనా. వీరిలో సగం మంది సన్నద్ధత కోసం కోచింగ్ కేంద్రాలను ఆశ్రయిస్తున్నవారే కావటం గమనార్హం.
ఇదీ చూడండి: షియోమీకి షాక్- అగ్రస్థానానికి శాంసంగ్
