దేశ పౌరులు, సంస్థలు స్విస్ బ్యాంకులో దాచుకున్న నిల్వల్లో భారత్.. మూడు స్థానాలు పడిపోయి 77వ స్థానానికి చేరింది. ఈ విషయంలో 2018లో 74వ స్థానంలో ఉండేది భారత్. గతేడాదితో పోలిస్తే 2019 నాటికి బ్యాంకు నిధులు కూడా 0.01 శాతం తగ్గాయి. 2019లో మొత్తం విదేశీ నిధుల్లో మన దేశం వాటా 0.06 శాతంగా ఉంది. ఈ మేరకు స్విట్జర్లాండ్ నేషనల్ బ్యాంక్(ఎస్ఎన్బీ)తాజా విషయాలను వెల్లడించింది.
భారత్కు సంబంధించి మొత్తం రూ. 6,625 కోట్ల నిధులు స్విస్ బ్యాంక్లో ఉన్నట్లు ఎస్ఎన్బీ స్పష్టం చేసింది. గతేడాదితో పోలిస్తే ఇది 6 శాతం తక్కువ.
టాప్-5 ఇవే..
ఈ విషయంలో బ్రిటన్ 27శాతం నిల్వలతో అగ్రస్థానంలో కొనసాగుతోంది. ఆ తర్వాతి స్థానాల్లో అమెరికా, వెస్టిండీస్, ఫ్రాన్స్, హాంగ్కాంగ్లు వరుసగా ఉన్నాయి. మొత్తం నిల్వల్లో టాప్-5 దేశాలే సుమారు 50 శాతం నిల్వలను కలిగిఉండగా.. టాప్-10 దేశాలు మూడింట రెండో వంతు సొమ్మును దాచాయి. తొలి 15 స్థానాల్లోని దేశాల మొత్తం విలువ 75 శాతంగా ఉంటుందని ఎస్ఎన్బీ తెలిపింది.
పొరుగు దేశాలూ అంతే..
పొరుగు దేశాలూ భారత్ కంటే దిగువ స్థాయిలోనే ఉన్నాయి. బంగ్లాదేశ్-85, పాకిస్థాన్-99వ ర్యాంకులతో టాప్-100లో చోటు దక్కించుకోగా.. నేపాల్- 118, శ్రీలంక-148, మయన్మార్-186, భూటాన్-196 స్థానాల్లో ఉన్నాయి.
గతంలో మాదిరి గోప్యత ప్రదర్శించని కారణంగా.. ఇటీవలి కాలంలో స్విస్ బ్యాంకులో నిధులు గణనీయంగా పడిపోయాయి.
ఆ దేశాల్లో మాత్రం వృద్ధి..
2019లో సెంట్రల్ ఆఫ్రికన్ రిపబ్లిక్ మాత్రం ఏకంగా 3,600 శాతంతో అత్యున్నత పెరగుదల నమోదుచేసింది. అంతేకాకుండా ఇరాక్ 500 శాతం, ఉత్తర కొరియా 110 శాతం వృద్ధితో టాప్-10 లో చోటు దక్కించుకున్నాయి. అయితే.. మాల్దీవులు మాత్రం ఏకంగా 97 శాతం పతనమైంది.
స్విట్జర్లాండ్ బ్యాంక్లో భారతీయులు కలిగి ఉన్న నల్లధనం పరిమాణాన్నిఈ గణాంకాలు సూచించవు. భారతీయులు, ప్రవాస భారతీయులు, ఇతరులతో పాటు మూడవ దేశ సంస్థల పేర్లతో కలిగి ఉన్న డబ్బును కూడా ఈ నివేదిక తెలియజేయదు.
ఇదీ చదవండి: 'చైనీయులకు గదులివ్వం.. భోజనం పెట్టం'
